துறைமுக நகரில் சீன நாட்டவர் கொலை – சிகிரியாவில் பதுங்கியிருந்த இரண்டு சீன நாட்டவர்கள் கைது

இலங்கை

கொழும்பு துறைமுக நகரப் பகுதியில் ஒரு சீன நாட்டவர் கடத்தப்பட்டு கொலை செய்யப்பட்ட சம்பவம் தொடர்பாக தேடப்பட்டு வந்த மேலும் இரண்டு சீன நாட்டவர்களை, கொழும்பு குற்றப்பிரிவு சிகிரியா பகுதியில் கைது செய்துள்ளது.

ஜூலை 23ஆம் திகதி கொழும்பு துறைமுக நகரத்தில் சீன நாட்டவர் குழுவினரிடையே ஏற்பட்ட மோதலைத் தொடர்ந்து ஒரு சீன நாட்டவர் கடத்தப்பட்டார்.

பின்னர், எஹெலியகொட பகுதியில் உள்ள ஒரு வனப்பகுதியில் அவரது சடலத்தை பொலிஸார் கண்டெடுத்தனர்.

இச்சம்பவம் தொடர்பாக சந்தேக நபர்கள் ஏற்கனவே கைது செய்யப்பட்டு காவலில் வைக்கப்பட்டிருந்தனர்.

மேலும், இக்கொலையில் ஈடுபட்டு அப்பகுதியிலிருந்து தப்பி ஓடிய ஏனைய சந்தேக நபர்கள் குறித்து கொழும்பு குற்றப்பிரிவு நீண்ட விசாரணை நடத்தியிருந்தது.

அதன்படி, மேலும் மூன்று சீன நாட்டினரைக் கைது செய்ய போலீசார் பொதுமக்களின் உதவியையும் கோரியிருந்தனர்.

இத்தகைய பின்னணியில், சிகிரியா பகுதியில் உள்ள ஒரு உணவகத்தில் பதுங்கியிருந்த இரு சீன நாட்டவர்களும் நேற்று (28) கைது செய்யப்பட்டனர்.

சந்தேக நபர்கள் இன்று (29) நீதிமன்றத்தில் ஆஜர்படுத்தப்பட உள்ளனர்.