7 இலட்சம் பெறுமதியான அலங்காரச் செடிகள் பறிமுதல் - பெங்களூருவிலிருந்து வந்த வியாபாரி கைது

இலங்கை

இந்தியாவிலிருந்து இலங்கைக்குச் சட்டவிரோதமான முறையில் அலங்காரச் செடிகளைக் கொண்டு வந்த வியாபாரி ஒருவர் கட்டுநாயக்க விமான நிலையத்தில் வைத்துச் சுங்க அதிகாரிகளால் கைது செய்யப்பட்டுள்ளார்.

இந்தியாவின் பெங்களூரு நகரில் இருந்து இன்று காலை கட்டுநாயக்க சர்வதேச விமான நிலையத்தை வந்தடைந்த பயணி ஒருவரை, அவர் மீது ஏற்பட்ட சந்தேகத்தின் அடிப்படையில் சுங்க அதிகாரிகள் சோதனையிட்டனர்.

இதன்போது, அனுமதியின்றி அலங்காரச் செடிகளைக் கடத்தி வந்தமை கண்டறியப்பட்டது.

கைது செய்யப்பட்டவர் வேயங்கொடை பகுதியைச் சேர்ந்த 40 வயதுடைய வியாபாரி என அடையாளம் காணப்பட்டுள்ளார்.

அவர் கொண்டு வந்த பயணப் பொதிகளைத் திறந்து சோதனையிட்டபோது, அவற்றுக்குள் மறைத்து வைக்கப்பட்டிருந்த 229 அலங்காரச் செடிகளை அதிகாரிகள் மீட்டுள்ளனர்.

கைப்பற்றப்பட்ட இந்தச் செடிகளின் மொத்த பெறுமதி 7 இலட்சம் ரூபாவிற்கும் அதிகம் என மதிப்பிடப்பட்டுள்ளது.

தாவரங்கள் மற்றும் அலங்காரச் செடிகளை நாட்டுக்குள் கொண்டு வரும்போது பின்பற்ற வேண்டிய உரிய அனுமதிப்பத்திர நடைமுறைகளை மீறிய குற்றச்சாட்டின் கீழ் இச்செடிகள் அரசுடைமையாக்கப்பட்டுள்ளன.

இச்சம்பவம் குறித்துச் சுங்கத் திணைக்களம் மேலதிக விசாரணைகளை முன்னெடுத்து வருகின்றது.

இலங்கையின் உயிரியல் பாதுகாப்பு விதிகளுக்கு அமைவாக, முறையான அனுமதியின்றி வெளிநாடுகளில் இருந்து தாவரங்களைக் கொண்டு வருவது தடைசெய்யப்பட்டுள்ளமை குறிப்பிடத்தக்கது.