இணையவழி வணிக நிதி மோசடி - ஒருவர் கைது

இலங்கை

இணையவழி வணிகத்தின் மூலம் பணம் சம்பாதிக்கலாம் என்று கூறி மோசடியில் ஈடுபட்டதாக, 26 வயதுடைய நபர் ஒருவர் கணினி குற்ற விசாரணைப் பிரிவின் வடமேல் மாகாணப் பிரிவினரால் கைது செய்யப்பட்டுள்ளார்.

டெலிகிராம் (Telegram) செய்திப் பரிமாற்றத் தளம் வழியாகத் தொடர்புகொண்ட நபர் ஒருவர், இணையவழி வணிக நடவடிக்கைகளின் மூலம் பெரும் வருமானம் ஈட்டித் தருவதாகக் கூறி, சந்தேக நபரின் வங்கிக் கணக்கிற்குப் பணத்தை மாற்றச் செய்து, 151,000 ரூபாயைத் மோசடியாகப் பெற்றுக்கொண்டதாக வந்த முறைப்பாட்டின் பேரில் விசாரணைகள் தொடங்கப்பட்டன.

முறைப்பாட்டின் படி, டெலிகிராம் வாயிலாகத் தொடர்புகொண்ட சந்தேக நபர், ஒரு ஆன்லைன் வணிகத்தின் மூலம் 135,072,200 ரூபாய் வருமானம் ஈட்ட முடியும் என்று கூறி, முறைப்பாட்டாளரை தனது வங்கிக் கணக்கிற்கு 151,000 ரூபாயைச் செலுத்தத் தூண்டியுள்ளார்.

குற்றச்சாட்டுக்குரிய மோசடியில் ஈடுபட்டிருக்கலாம் என்ற சந்தேகத்தின் பேரிலும், அந்தக்குற்றச் செயலுக்கு உதவியும் ஆதரவும் வழங்கியிருக்கலாம் என்ற சந்தேகத்தின் பேரிலும் சந்தேகநபர் நேற்று (20) கைது செய்யப்பட்டார்.

சந்தேக நபர் சூரியவெவ பகுதியைச் சேர்ந்தவர். 

கணினி குற்றங்கள் புலனாய்வுப் பிரிவின் வடமேல் மாகாணப் பிரிவு, இந்தச் சம்பவம் குறித்து மேலதிக விசாரணைகளை மேற்கொண்டு வருகிறது.