இலங்கையில் நீதிபதிகள் ஓய்வு வயது நீட்டிப்புக்கு சர்வதேச நீதிபதிகள் சங்கம் கவலை

இலங்கை

இலங்கையில் உயர் நீதிமன்றம் மற்றும் மேன்முறையீட்டு நீதிமன்ற நீதிபதிகளின் ஓய்வு வயது தொடர்பான முன்மொழியப்பட்ட அரசியலமைப்புத் திருத்தங்கள் குறித்து, சர்வதேச நீதிபதிகள் சங்கம் (IAJ) தனது கவலையை வெளிப்படுத்தி அறிக்கை ஒன்றை வெளியிட்டுள்ளது.

நீதித்துறையின் சுதந்திரத்தைப் பாதுகாப்பதன் முக்கியத்துவத்தை வலியுறுத்தும் அச்சங்கம், முன்மொழியப்பட்ட நடவடிக்கைகளை கவனமாக மீள்பரிசீலனை செய்யுமாறு கேட்டுக்கொண்டுள்ளது. 

இது தொடர்பில் சர்வதேச நீதிபதிகள் சங்கம் திங்கட்கிழமை (03) வெளியிட்டுள்ள அறிக்கையில் தெரிவிக்கப்பட்டுள்ளதாவது,

உயர் நீதிமன்றம் மற்றும் மேல்முறையீட்டு நீதிமன்ற நீதிபதிகளின் ஓய்வுபெறும் வயதை இரண்டு ஆண்டுகள் நீட்டிக்கும் வகையில் அரசியலமைப்பைத் திருத்துவதற்கான சட்டத்தை அறிமுகப்படுத்தவுள்ளதாக இலங்கை அரசாங்கம் அண்மையில் அறிவித்துள்ளது. 

இந்த முன்மொழியப்பட்ட சட்டவரைவு குறித்து, இலங்கை நீதிச் சேவைச் சங்கம் (Judicial Service Association of Sri Lanka) மற்றும் பொதுநலவாய சட்டத்தரணிகள் சங்கம் (Commonwealth Lawyers Association) உள்ளிட்ட பல அமைப்புகள் மற்றும் விமர்சகர்கள் வெளிப்படுத்தியுள்ள தீவிரமான கவலைகளை IAJ-ம் பகிர்ந்துகொள்கிறது.

நீதிபதிகளுக்கான கட்டாய ஓய்வு வயதில் மாற்றங்களைச் செய்யும் பொதுவான கோட்பாட்டைக் காட்டிலும், முன்மொழியப்பட்டுள்ள இந்தச் சட்டத்தின் (i) அறிமுக நேரம் மற்றும் அறிமுகப்படுத்தப்பட்ட விதம், (ii) இதற்கான காரணமாகப் பரவலாகக் கருதப்படும் அம்சம் ஆகியவையே IAJ-க்கு மிகுந்த கவலையை அளிக்கின்றன.

முதலாவதாக, இத்தகைய முன்மொழியப்பட்ட சட்டத்தை அறிமுகப்படுத்துவதற்கான காலமும் முறையும், தற்போதைய சூழலில் காணப்படுவது போன்ற தன்னிச்சையான, அவசரமான மற்றும் கட்டாயப்படுத்தும் வகையிலான அறிவிப்பின் அடிப்படையில் அமையக்கூடாது.

மாறாக, அது நன்கு பரிசீலிக்கப்பட்ட, கொள்கைசார்ந்த, கலந்தாலோசனைக்கு உட்பட்ட மற்றும் வலுவான அரசியலமைப்புத் திருத்த நடைமுறையின் அடிப்படையில் அமைய வேண்டும். 

இல்லையெனில், நீதித்துறையின் சுதந்திரம் அச்சுறுத்தலுக்கு உள்ளாகும்.

இரண்டாவதாக, முன்மொழியப்பட்ட இச்சட்டம் ஒரு குறிப்பிட்ட நீதித்துறை அதிகாரி அல்லது அதிகாரிகளுக்கு பயனளிக்கும் வகையில் வடிவமைக்கப்பட்டுள்ளதாகப் பல அறிவுள்ள பார்வையாளர்கள் கருதினால்  உண்மையில் அரசின் நோக்கம் அதுவாக இருந்தாலும் இல்லாவிட்டாலும் சரி அது நீதித்துறையின் சுதந்திரத்தைக் குலைப்பதாக அமைகிறது.

இத்தகைய தீவிரமான கவலைகளைக் கருத்தில் கொண்டு, முன்மொழியப்பட்டுள்ள சட்டவரைவை அது தற்போதுள்ள வடிவிலேயே மறுபரிசீலனை செய்யுமாறு இலங்கை அரசை IAJ பணிவுடன் கேட்டுக்கொள்கிறது. இலங்கைபொருளாதாரம்

இலங்கையில் நிலவும் சூழலை நாங்கள் தொடர்ந்து உன்னிப்பாகக் கண்காணிப்போம் – என்று கூறப்பட்டுள்ளது.

சர்வதேச நீதிபதிகள் சங்கம் 1953-ஆம் ஆண்டு ஆஸ்திரியாவின் சால்ஸ்பர்க் நகரில் நிறுவப்பட்டது. 

இது உலகெங்கிலும் உள்ள ஐந்து கண்டங்களைச் சேர்ந்த 93 தேசிய நீதிபதிகள் சங்கங்களைப் பிரதிநிதித்துவப்படுத்தும், நீதிபதிகளுக்கான சங்கங்களின் மிகப்பெரிய மற்றும் மிகவும் மதிப்புமிக்க உலகளாவிய அமைப்பாகும்.

நீதித்துறையின் முறையான செயல்பாட்டிற்கும், மனித உரிமைகள் மற்றும் சுதந்திரங்களை வலுப்படுத்துவதற்கும், சட்டத்தின் ஆட்சிக்கான மரியாதையை மேம்படுத்துவதற்கும் இன்றியமையாததாக விளங்கும் நீதித்துறையின் சுதந்திரத்தைப் பாதுகாப்பதே இதன் முதன்மை நோக்கமாகும்.