கல்முனையிலிருந்து சவுதி சிறை வரை - ஒரு கருத்தால் தலைகீழான அனோஜனின் வாழ்க்கை

இலங்கை

இலங்கை முழுவதும் ஆயிரக்கணக்கான இந்து யாத்ரீகர்களின் மனதைக் கவர்ந்த ஒரு தெருநாயைப் பற்றிய நெகிழ்ச்சியான கதையாக இது தொடங்கியது.  SouthAsians & Diaspora

ஆனால், ஃபேஸ்புக்கில் பதிவிட்ட ஒரே ஒரு கருத்துக்காக, கிழக்கு நகரமான கல்முனையைச் சேர்ந்த இலங்கை புலம்பெயர் தொழிலாளி ஒருவருக்கு சவுதி அரேபிய சிறையில் ஐந்து ஆண்டுகள் சிறைத்தண்டனை விதிக்கப்பட்டதோடு இது முடிவடைந்தது.

அத்துடன், அவர் அபராதத் தொகையை செலுத்தவில்லை என்றால் மேலும் 5 ஆண்டுகள் சிறைத்தண்டனை அனுபவிக்கக் கூடும்.

சவுதி அரேபியாவில் பணிபுரிந்து வந்த இலங்கைத் தமிழரான அனோஜன் (இவரது பெயரை இவரது குடும்பத்தினர் உறுதிப்படுத்தியுள்ளனர்) மீது, நபிகள் நாயகத்தை அவமதிக்கும் வகையிலான முகநூல் கருத்து ஒன்றை வெளியிட்டதாகக் குற்றம் சாட்டப்பட்டு, ஞாயிற்றுக்கிழமையன்று (26) தண்டனை விதிக்கப்பட்டது. 

அத்துடன், 30 இலட்சம் சவுதி ரியால்கள் அபராதமாகவும் விதிக்கப்பட்டதாக அவரது உறவினர்கள் தெரிவித்தனர்.

இந்த அபராதத் தொகை சுமார் 26 கோடி இலங்கை ரூபாய்க்கு இணையான மிகப் பெரிய தொகையாகும்.

இலங்கை சமூக ஆர்வலரான ராஜீவ் குமார் ராஜீவ்காந்த் மூலம் இந்தத் தீர்ப்பு குறித்த தகவல் வெளியானது.

தீர்ப்பு வெளியான சிறிது நேரத்திலேயே அனோஜனின் சகோதரருடன் தொலைபேசியில் பேசியதாக அவர் இணையத்தில் வெளியிட்ட காணொளி ஒன்றில் தெரிவித்தார். 

அனோஜனுக்கு ஐந்து ஆண்டுகள் சிறைத்தண்டனையும் 30 இலட்சம் சவுதி ரியால் அபராதமும் விதிக்கப்பட்டுள்ளதாக அவரது குடும்பத்தினர் தன்னிடம் கூறியதாகக் குறிப்பிட்ட ராஜீவ்காந்த், அந்த உரையாடலின்போது அனோஜனின் தாயாரும் மற்ற உறவினர்களும் கதறி அழுத சத்தம் கேட்டதாகவும் கூறினார்.

இலங்கையின் வடக்கு மாகாணத்திலிருந்து தீவின் தென்கோடியில் அமைந்துள்ள முருகப்பெருமானின் கதிர்காமம் ஆலயத்திற்கு ஆண்டுதோறும் பக்தர்களை ஈர்க்கும் இரு மாத கால இந்து பாத யாத்திரையின் போது நிகழ்ந்த, எதிர்பாராத தொடர் நிகழ்வுகளிலிருந்தே இந்த வழக்கு உருவானது.

பயணத்தின்போது, ​​ஒரு தெருநாய் யாத்ரீகர்களுடன் இணைந்து கொண்டதுடன், அவர்களை விட்டு விலகாமலும் இருந்தது. 

அதன் விடாமுயற்சியால் ஈர்க்கப்பட்ட பக்தர்கள், அதற்கு முருகனின் மற்றொரு பெயரான ‘சுப்ரமணி’ என்று பெயரிட்டு, பிஸ்கட், ரொட்டி, பால் மற்றும் சாதம் போன்ற சைவ உணவுகளை அளித்து வந்தனர். 

நூற்றுக்கணக்கான மைல்கள் தூரம் அந்த ஊர்வலத்துடன் நடந்து சென்ற அந்த விலங்கின் காணொளிகள் இணையத்தில் வேகமாகப் பரவின; பல யாத்ரீகர்கள் அதனை நம்பிக்கை மற்றும் மன உறுதியின் அடையாளமாகக் கருதத் தொடங்கினர்.

கிழக்கு நகரமான கல்முனையில், ஒரு இளம் முஸ்லிம் நபர் நாயை உதைக்கும் காட்சி காணொளியாகப் பதிவாகிப் பரவியதைத் தொடர்ந்து அங்கு சூழல் மாறியது. 

இக்காணொளி பரவலாகப் பகிரப்பட்டு, முஸ்லிம் மதத் தலைவர்கள் உட்படப் பல தரப்பினரிடமிருந்தும் கடும் கண்டனத்தைப் பெற்றது. 

அந்த நபர் கைது செய்யப்பட்டு, மன்னிப்பு கோரியதையடுத்து பிணையில் விடுவிக்கப்பட்டார்.

இணையத்தில் எழுந்த கோபம் அதோடு நின்றுவிடவில்லை. 

சமூக ஊடகங்களில் இந்த விவாதம் பரவியபோது, ​​இரு தரப்பிலிருந்தும் மதச் சமூகங்களை இலக்காகக் கொண்ட அவதூறான பதிவுகள் வெளியாகின.

சவுதி அதிகாரிகள் நபிகள் நாயகத்திற்கு இழைக்கப்பட்ட அவமதிப்பாகக் கருதிய கருத்து, அத்தகைய பதிவுகளில் ஒன்று என்று அனோஜனின் குடும்பத்தினர் தெரிவித்தனர்.

இஸ்லாத்திற்கு அவமதிப்பை ஏற்படுத்துவதாகக் கருதப்படும் கருத்துகளுக்கு எதிராக, உலகின் மிகக் கடுமையான சட்டங்களில் சிலவற்றை சவுதி அரேபியா அமுல்படுத்துகிறது. இத்தகைய வழக்குகள் அந்நாட்டின் இணையக் குற்றத் தடுப்புச் சட்டங்கள் அல்லது இஸ்லாமியச் சட்டத்தின் பரந்த விளக்கங்களின் அடிப்படையில் விசாரிக்கப்படலாம்.

மேலும், இணையத்தில் வெளியிடப்படும் கருத்துகளுக்காகச் சிறைத்தண்டனைகளையும் கடுமையான அபராதங்களையும் அந்நாட்டு நீதிமன்றங்கள் கடந்த காலங்களில் விதித்துள்ளன.

அந்தக் காணொளியில், சவுதி அரேபியாவில் குற்றவியல் நடவடிக்கையாக இதைத் தீவிரப்படுத்துவதற்குப் பதிலாக, ஏதேனும் தவறு நிகழ்ந்திருந்தால் அது இலங்கைச் சட்டத்தின்படியே விசாரிக்கப்பட்டு நடவடிக்கை எடுக்கப்பட்டிருக்க வேண்டும் என்று வாதிட்ட ராஜீவ்காந்த், சில இலங்கை முஸ்லிம்கள் இச்சச்சரவை பெரிதுபடுத்தியதாகக் குற்றம் சாட்டினார். SouthAsians & Diaspora

எவ்வாறெனினும், அறிவிக்கப்பட்ட இந்தத் தண்டனைத் தீர்ப்பு, இலங்கையைச் சேர்ந்த புலம்பெயர் தொழிலாளர்கள் மற்றும் மனித உரிமை ஆர்வலர்களிடையே கலக்கத்தை ஏற்படுத்தியுள்ளது. 

கருணை மற்றும் மன்னிப்புக்கு இஸ்லாம் அளிக்கும் முக்கியத்துவத்தைச் சுட்டிக்காட்டி, இலங்கையின் முஸ்லிம் சமூகத்தைச் சேர்ந்த பலர் அனோஜனுக்கு மன்னிப்பு வழங்குமாறு கோரிக்கை விடுத்துள்ளனர்.

நபிகள் நாயகமே இன்று உயிருடன் இருந்திருந்தால் அனோஜனை மன்னித்திருப்பார் என்றும் சிலர் வாதிடுகின்றனர். 

அவர் கூறிய கருத்து மிகவும் மோசமானதுதான்; ஆனால் அதற்காக அவரைச் சிறையில் அடைக்கும் அளவுக்கு நாமும் மோசமாக நடந்துகொள்ள வேண்டியதில்லை என்று சமூக ஊடகங்களில் முஸ்லிம் நபர் ஒருவர் கருத்து தெரிவித்துள்ளார்.

இருப்பினும், இஸ்லாமியச் சட்டத்தைப் பற்றிய தங்கள் புரிதலின் அடிப்படையில் கடுமையான தண்டனை வழங்கப்பட வேண்டும் என்று ஒரு சிறு தரப்பினர் வலியுறுத்தினர்.

சவுதி அரேபியா மற்றும் பிற வளைகுடா நாடுகளில் இலட்சக்கணக்கான இலங்கையர்கள் பணிபுரிகின்றனர்; அவர்கள் தாயகத்திற்கு அனுப்பும் பணம் நாட்டின் பொருளாதாரத்தின் முக்கியத் தூணாகத் திகழ்கிறது. 

இத்தகைய பொருளாதாரச் சார்ந்திருப்பு நிலை, தொழிலாளர்களைத் தங்கள் சொந்த நாட்டின் சட்ட அமைப்புகளிலிருந்து முற்றிலும் மாறுபட்ட சட்ட நடைமுறைகளுக்கு உட்படுத்தும் அபாயத்தை உருவாக்குகிறது என்று மனித உரிமை அமைப்புகள் நீண்டகாலமாக எச்சரித்து வருகின்றன.