புற்றுநோய்க்கு எதிராக தன்னையே ஆய்வகமாக மாற்றிய விஞ்ஞானி!

உலகப் புகழ்பெற்ற புற்றுநோய் ஆராய்ச்சியாளரான பேராசிரியர் ரிச்சர்ட் ஸ்கோல்யர், தனது உயிருக்கு ஆபத்தான மூளைக் கட்டிக்கு (Glioblastoma) பரிசோதனை நோய் எதிர்ப்பு சிகிச்சையை (Experimental Immunotherapy) முதலில் தன் உடலிலேயே சோதித்த விஞ்ஞானியாக அறியப்பட்டவர். அவர் தனது 59-வது வயதில் காலமானார்.

2023-ஆம் ஆண்டு, குணப்படுத்த மிகவும் கடினமான மற்றும் வேகமாக பரவும் Glioblastoma என்ற மூளைப் புற்றுநோய் அவருக்கு இருப்பது கண்டறியப்பட்டது. வழக்கமான சிகிச்சை முறையை ஏற்றுக்கொள்ளாமல், தனது நீண்டகால சக பணியாளரான புற்றுநோய் நிபுணர் டாக்டர் ஜார்ஜினா லாங் உடன் இணைந்து, மெலனோமா (Melanoma) தோல் புற்றுநோய்க்காக உருவாக்கிய புதிய நோய் எதிர்ப்பு சிகிச்சையை தனது மூளைக் கட்டிக்காக மாற்றியமைத்து பயன்படுத்தினார்.

மருத்துவ வரலாற்றில் முதல்முறையாக, அறுவை சிகிச்சைக்கு முன்பே அந்த பரிசோதனை சிகிச்சையை அவர் தன் உடலில் பெற்றார். கட்டி இன்னும் செயல்பாட்டில் இருக்கும் போதே, நோய் எதிர்ப்பு மண்டலத்தைத் தூண்டுவதே இதன் நோக்கமாக இருந்தது.

தனது சிகிச்சை அனுபவத்தையும் உடல்நிலை மாற்றங்களையும் அவர் வெளிப்படையாகப் பதிவு செய்தார். இதன் மூலம் கிடைத்த மருத்துவத் தகவல்கள், அமெரிக்கா உள்ளிட்ட பல நாடுகளில் புதிய மருத்துவ பரிசோதனைகள் தொடங்குவதற்கு முக்கிய அடித்தளமாக அமைந்துள்ளன.

இந்த சிகிச்சை அவரது புற்றுநோயை முழுமையாக குணப்படுத்தவில்லை. இருப்பினும், அவரது ஆயுளை குறிப்பிடத்தக்க அளவு நீட்டித்ததோடு, மூளைக் கட்டி சிகிச்சையை அணுகும் மருத்துவ உலகின் பார்வையையும் மாற்றியது.

2026 ஜூன் 7-ஆம் தேதி உயிரிழப்பதற்கு முன், 2024-ஆம் ஆண்டின் "Australian of the Year" விருதைப் பெற்றிருந்த அவர், தனது இந்த இறுதி தியாகம் எதிர்கால புற்றுநோய் நோயாளிகளுக்கு அதிக நாட்கள் வாழும் வாய்ப்பையும், புதிய நம்பிக்கையையும் வழங்கும் என்ற நம்பிக்கையை வெளிப்படுத்தினார்.

மெலனோமா புற்றுநோய் சிகிச்சையில் புரட்சியை ஏற்படுத்தியதோடு, தனது சொந்த உடலையே அறிவியல் ஆய்வகமாக மாற்றி மனிதகுலத்தின் நலனுக்காக அர்ப்பணித்த அவரது தியாகம் என்றும் நினைவுகூரப்படும். 

Varun Varathan