இலங்கைக்கான தனது வலுவான ஆதரவை மீண்டும் உறுதிபடுத்திய சர்வதேச நாணய நிதியம்

இலங்கை

விரிவாக்கப்பட்ட நிதி வசதியின் (EFF) கீழ் இலங்கையின் ஒருங்கிணைந்த ஐந்தாவது மற்றும் ஆறாவது மீளாய்வுக்கு ஒப்புதல் அளிப்பது குறித்து பரிசீலிப்பதற்காக, தனது நிர்வாகக் குழு வரும் வாரங்களில் கூடும் என்று எதிர்பார்ப்பதாக சர்வதேச நாணய நிதியம் (IMF) நேற்று தெரிவித்தது. 

இந்த நடவடிக்கை நாட்டிற்கு சுமார் 700 மில்லியன் டொலர் நிதியுதவியைப் பெற்றுத் தரக்கூடும்.

சர்வதேச நாணய நிதியத்தில் வியாழக்கிழமை (14) நடைபெற்ற ஊடகவிலாளர் சந்திப்பில் பேசும்போது IMF இன் தகவல் தொடர்புத் துறை பணிப்பாளர் ஜூலி கொசாக் (Julie Kozack) இந்த விடயத்தைக் குறிப்பிட்டார்.

இது தொடர்பில் மேலும் பேசிய அவர்,

ஏப்ரல் 9 ஆம் திகதி சர்வதேச நாணய நிதியத்தின் குழுவும் இலங்கை அதிகாரிகளும், விரிவாக்கப்பட்ட நிதி வசதியின் கீழ் ஐந்தாவது மற்றும் ஆறாவது ஒருங்கிணைந்த மீளாய்வுக்காக ஒரு பணியாளர் மட்ட ஒப்பந்தத்தை எட்டினர்.

நிச்சயமாக, இந்த மீளாய்வின் நிறைவு நமது செயற்குழுவின் ஒப்புதலுக்கு உட்பட்டது. 

செயற்குழு கூட்டம் வரும் வாரங்களில் நடைபெறும் என்று நாங்கள் எதிர்பார்க்கிறோம்.

இந்தத் திட்டத்தை எங்கள் நிர்வாகச் சபையின் முன் கொண்டு வருவதற்கு முன்பு, இலங்கை சில முந்தைய நடவடிக்கைகள் முடிக்கப்பட வேண்டியிருந்தன. 

அவை, செலவு மீட்பு, மின்சாரம் மற்றும் எரிபொருள் விலைகளை மீட்டெடுப்பதுடன், நலிவடைந்த மக்களைப் பாதுகாப்பதும் ஆகும். 

எனவே, செலவு மீட்பு நடவடிக்கையை நோக்கி நகர்வதில் இரண்டு பகுதிகள் இருந்தன. 

செலவு மீட்பு நடவடிக்கையை நோக்கி நகர்வது, அதே சமயம் நலிவடைந்த மக்கள் பாதுகாக்கப்படுவதை உறுதி செய்வது, மற்றும் நிதி உத்தரவாதங்கள் குறித்த மீளாய்வை நிறைவு செய்வது ஆகியவையே அவையாகும். 

இந்த மீளாய்வு எங்கள் நிர்வாகச் சபையால் அங்கீகரிக்கப்பட்டவுடன், இலங்கைக்கு சுமார் 700 மில்லியன் அமெரிக்க டொலர் நிதி கிடைக்கும். 

மேலும், வரும் வாரங்களில் சபைக் கூட்டம் நடைபெறும் என்று நாங்கள் எதிர்பார்க்கிறோம்.

மேலும், இலங்கை இரண்டு மிகப் பெரிய அதிர்ச்சிகளால் பாதிக்கப்பட்டுள்ளது.

முதலாவதாக டித்வா புயல், இது பொருளாதாரத்திற்கு ஒரு மாபெரும் அதிர்ச்சியாக இருந்ததுடன், இலங்கை மக்களுக்கு ஒரு மனிதாபிமான அதிர்ச்சியாகவும் அமைந்தது. 

அது மக்களுக்கு உண்மையிலேயே துயரமானதாகவும் பேரழிவை ஏற்படுத்தக்கூடியதாகவும் இருந்தது. 

இப்போது, ​​நிச்சயமாக மத்திய கிழக்கில் நடக்கும் போரினாலும் இலங்கை பாதிக்கப்பட்டுள்ளது.

இந்த அதிர்ச்சிகளின் ஊடே இலங்கை பொருளாதாரமும் இலங்கை மக்களும் உண்மையிலேயே குறிப்பிடத்தக்க மீள்திறனை வெளிப்படுத்தியுள்ளனர். 

மேலும், இத்திட்டத்தின் கீழ் கடந்த பல ஆண்டுகளாக இலங்கை மிகுந்த சிரத்தையுடன் மேற்கொண்டு வரும் லட்சியமிக்க சீர்திருத்தங்கள் பலனளித்து வருகின்றன. 

நாம் காணும் பொருளாதார மீள்திறனுக்கும், இலங்கைப் பொருளாதாரத்தில் நாம் காணும் வலுவான விளைவுகளுக்கும் இந்தச் சீர்திருத்தங்களே ஓர் அடித்தளமாக அமைந்துள்ளன.

2025-ஆம் ஆண்டில் இலங்கையின் நிதி செயல்திறன் மிகவும் வலுவாக இருந்துள்ளது என்பதை நான் குறிப்பாக சுட்டிக்காட்ட விரும்புகிறேன். 

மேலும், இதற்கு வருவாய் பக்கமே பெரும் ஆதரவு கிடைத்துள்ளது. 

கடன் மறுசீரமைப்பு ஏறக்குறைய நிறைவடைந்துள்ளது, 2025-ஆம் ஆண்டில் பொருளாதாரம் 5 சதவீதம் வளர்ச்சி கண்டது, எதிர்மறை நிலையில் இருந்த பணவீக்கம், தற்போது நேர்மறை நிலைக்குத் திரும்பியுள்ளது. 

ஆகவே, இலங்கைப் பொருளாதாரம் சிறப்பாகச் செயல்படுகிறது என்பதையும், சீர்திருத்தங்களுக்கான அதிகாரிகளின் உறுதிப்பாடு வலுவாக உள்ளது என்பதையும், அவர்களுக்கு எவ்வாறு சிறந்த முறையில் தொடர்ந்து ஆதரவளிக்க முடியும் என்பதை மதிப்பிடுவதற்காக நாங்கள் அதிகாரிகளுடன் மிக நெருக்கமாகப் பணியாற்றுவோம்.

இலங்கையும் இலங்கை மக்களும் அமைதியையும் மேலும் நிலையான பொருளாதாரத்தையும் அடைய முயலும் வேளையில், அவர்களுக்கு ஆதரவளிப்பதில் நாங்கள் மிகுந்த உறுதியுடன் இருக்கிறோம். 

எனவே, நாங்கள் அவர்களுடன் மிக நெருக்கமாகப் பணியாற்றுவதைத் தொடர்வோம், மேலும் இலங்கைக்கு ஆதரவளிப்பதில் எங்களது உறுதிப்பாடு அசைக்க முடியாதது.