க.பொ.த. உயர்தரப் பரீட்சைகள் இன்று ஆரம்பம்

இலங்கை

2024 கல்விப் பொதுத் தராதர உயர்தரப் பரீட்சையானது இன்று (25) ஆரம்பமாகவுள்ளது.

அதன்படி இன்று முதல் எதிர்வரும் டிசம்பர் 20 ஆம் திகதி வரையான 22 நாட்களுக்கு பரீட்சை நடைபெறும்.

உயர்தரப் பரீட்சைக்காக நாடளாவிய ரீதியில் 2,312 பரீட்சை நிலையங்கள் தயார் செய்யப்பட்டுள்ளது.

இம்முறை பரீட்சைக்கு 333,183 மாணவர்கள் தோற்றவுள்ளனர்.

அவர்களில் 253,390 பேர் பாடசாலை பரீட்சார்த்திகளும் 79,795 தனியார் பரீட்சார்த்திகளும் ஆவர்.

பரீட்சைகள் காலை 8.30 மணிக்கு ஆரம்பமாகவுள்ளதாகவும் அதற்கு முன்னதாக செல்லுபடியாகும் அடையாள அட்டையுடன் பரீட்சை நிலையங்களுக்கு செல்லுமாறு பரீட்சைகள் ஆணையாளர் நாயகம் அமித் ஜயசுந்தர அறிவுறுத்தியுள்ளார்.

பரீட்சைக்கு தோற்றுவதற்கு முன்னர் அனுமதி அட்டையில் குறிப்பிடப்பட்டுள்ள பரீட்சார்த்தியின் கையொப்பத்தை தகுதியான ஒருவரால் சரிபார்க்க வேண்டியது அவசியமானது எனவும் பரீட்சைகள் ஆணையாளர் நாயகம் சுட்டிக்காட்டியுள்ளார்.

இதேவேளை, உயர்தரப் பரீட்சை காலத்தில் ஏற்படக்கூடிய அனர்த்தங்களைத் தவிர்ப்பதற்காகவும் விசேட ஏற்பாடுகள் அனர்த்த முகாமைத்துவ மத்திய நிலையத்தின் உதவியுடன் செய்யப்பட்டுள்ளன.