கனடிய தபால் திணைக்களம் பாரிய நட்டத்தில்

கனடா

கனடாவின் அரச நிறுவனமான 'கனடா போஸ்ட்' (Canada Post), 2025-ம் நிதியாண்டில் வரிக்கு முந்தைய நஷ்டமாக 1.57 பில்லியன் டாலர்களைப் பதிவு செய்துள்ளது.

இது அந்த நிறுவனத்தின் வரலாற்றிலேயே பதிவான மிகப்பெரிய நஷ்டம் என திங்கட்கிழமை வெளியிடப்பட்ட செய்திக்குறிப்பில் தெரிவிக்கப்பட்டுள்ளது.

கடந்த 2024-ம் ஆண்டுடன் ஒப்பிடுகையில், 2025-ல் நஷ்டமானது 728 மில்லியன் டாலர்கள் (சுமார் 86.7%) அதிகரித்துள்ளது.

2018-ம் ஆண்டு முதல் இதுவரை கனடா போஸ்ட் நிறுவனம் ஒட்டுமொத்தமாக 5 பில்லியன் டாலர்களுக்கும் அதிகமான இழப்பைச் சந்தித்துள்ளது.

நவீன காலத்திற்கு ஏற்ப மாற்றமடையாத பழைய விதிமுறைகள், பெருகி வரும் போட்டி மற்றும் தொழிலாளர் சங்கங்களுடனான இழுபறி போன்ற காரணங்களால் நிறுவனத்தின் நிதிநிலை மோசமடைந்துள்ளதாகத் தெரிவிக்கப்பட்டுள்ளது.

நிறுவனத்தின் நிதி நிலைமை மிகவும் தீவிரமாக உள்ளது; நாட்டை நவீனப்படுத்த வேண்டிய கட்டாயத்தில் நாம் இருக்கிறோம், என அந்நிறுவனம் குறிப்பிட்டுள்ளது.

இந்த நிதி நெருக்கடியைச் சமாளிக்கும் ஒரு பகுதியாக, கனடா முழுவதும் வீடு வீடாகச் சென்று தபால்களை வழங்கும் முறையை (door-to-door delivery) நிறுத்துவதாகக் கடந்த வாரம் அதிரடி அறிவிப்பை வெளியிட்டது.

இதன் மூலம் ஆண்டுக்குச் சுமார் 400 மில்லியன் டாலர்களைச் சேமிக்க முடியும் என ஒட்டாவா மதிப்பிட்டுள்ளது.

இழந்த நிதித்தன்மையை மீட்டெடுக்கவும், இன்றைய பொருளாதாரச் சூழலுக்கு ஏற்ப கனடா மக்களுக்குச் சிறந்த சேவையை வழங்கவும் "மாற்றத்தக்க நடவடிக்கைகளை" முன்னெடுத்து வருவதாக கனடா போஸ்ட் தெரிவித்துள்ளது.