சர்வதேச நாணய நிதியத்துடன் புதிய ஒப்பந்தம்? ஜனாதிபதி வெளியிட்ட தகவல்

இலங்கை

இலங்கையில் தற்போதைய சர்வதேச நாணய நிதியத்தின் (IMF) திட்டம் நிறைவடைந்த பின்னர், மற்றுமொரு திட்டத்தில் இணைவதற்கான சாத்தியக்கூறுகள் நிராகரிக்கப்படவில்லை என ஜனாதிபதி அநுரகுமார திஸாநாயக்க தெரிவித்துள்ளார்.

எனினும், இது தொடர்பில் அரசாங்கம் இதுவரையில் இறுதித் தீர்மானம் எதனையும் எடுக்கவில்லை என்றும் அவர் குறிப்பிட்டுள்ளார்.

இலங்கை வர்த்தக சம்மேளனம் ஏற்பாடு செய்திருந்த கலந்துரையாடலில் பங்கேற்றுப் பேசும்போதே ஜனாதிபதி இதனைத் தெரிவித்துள்ளார். 

தற்போதைய IMF திட்டத்தின் கீழ் அடைந்துள்ள பொருளாதார ஸ்திரத்தன்மையைப் பாதுகாத்துக்கொண்டு, நாட்டின் பொருளாதார வளர்ச்சிக்கு முன்னுரிமை அளிக்கும் வகையிலான புதிய ஒப்பந்தம் தொடர்பில் அரசாங்கம் ஆராய்ந்து வருவதாகவும் அவர் கூறியுள்ளார்.

பொருளாதார நெருக்கடியைத் தொடர்ந்து நாட்டின் பொருளாதாரத்தை மீண்டும் ஸ்திரப்படுத்துவதில் இலங்கை கணிசமான முன்னேற்றத்தை அடைந்துள்ளதாகக் குறிப்பிட்ட ஜனாதிபதி, எதிர்பார்க்கப்படும் மட்டத்திற்கு வெளிநாட்டு கையிருப்புகளை அதிகரிப்பதுடன், நாட்டின் கடன் தர மதிப்பீட்டையும் மேலும் மேம்படுத்த வேண்டியுள்ளதாகத் தெரிவித்துள்ளார்.

தற்போதைய IMF திட்டம் பொருளாதார ஸ்திரத்தன்மையை மீட்டெடுப்பதில் பிரதான கவனம் செலுத்தியதாகவும், அடுத்த கட்டத்தில் அந்த ஸ்திரத்தன்மையைப் பாதிக்காமல் பொருளாதார வளர்ச்சியை முன்னெடுப்பதற்கு முன்னுரிமை அளிக்கப்பட வேண்டும் என்றும் அவர் வலியுறுத்தியுள்ளார்.

நாட்டின் பொருளாதார வளர்ச்சி இலக்குகளுக்கு ஆதரவளிக்கும் வகையில் புரிந்துணர்வை எட்ட முடிந்தால், IMF உடனான புதிய ஒப்பந்தத்தில் கைச்சாத்திட அரசாங்கம் தயாராக இருப்பதாகவும் ஜனாதிபதி தெரிவித்துள்ளார்.

இதற்கிடையில், எதிர்கால IMF திட்டம் எத்தகைய வடிவத்தில் அமைய வேண்டும் என்பது தொடர்பில் நிதி அமைச்சு மற்றும் மத்திய வங்கி உள்ளிட்ட அரசாங்கத்தின் உயர்மட்டப் பொருளாதார அதிகாரிகளுக்கு இடையில் கலந்துரையாடல்கள் இடம்பெற்று வருவதாகவும் அவர் குறிப்பிட்டுள்ளார்.

எனினும், IMF உடனான தொடர்புகளை முழுமையாகக் கைவிடுவதற்கோ அல்லது புதிய திட்டத்தில் இணைவதற்கு உறுதியளிப்பதற்கோ அரசாங்கம் இதுவரை தீர்மானிக்கவில்லை என ஜனாதிபதி தெளிவுபடுத்தியுள்ளார்.

இலங்கையின் பொருளாதார நிலைமை, வெளிநாட்டு கையிருப்புகளின் வலிமை மற்றும் எதிர்காலத்தில் ஏற்படக்கூடிய வெளிப்புறப் பொருளாதார அதிர்வுகளை எதிர்கொள்ளும் திறன் ஆகியவற்றின் அடிப்படையிலேயே இறுதித் தீர்மானம் எடுக்கப்படும் என்றும் அவர் தெரிவித்துள்ளார்.

மத்திய கிழக்கில் நிலவும் மோதல்களின் தாக்கம் குறித்துக் கருத்துத் தெரிவித்த ஜனாதிபதி, தற்போதைய போக்கு தொடர்ந்தால், இலங்கையின் எரிபொருள் இறக்குமதிச் செலவு 2026ஆம் ஆண்டில் சுமார் 6 பில்லியன் அமெரிக்க டொலர்களை எட்டக்கூடும் என எச்சரித்துள்ளார்.

இந்தச் செலவு 2025ஆம் ஆண்டில் சுமார் 4.4 பில்லியன் அமெரிக்க டொலர்களாக இருந்ததாகவும் அவர் சுட்டிக்காட்டியுள்ளார்.

இத்தகைய நிலைமைகள் நாட்டின் பொருளாதாரம் எதிர்கொள்ளும் நிச்சயமற்ற தன்மையை எடுத்துக்காட்டுவதாகவும், மேலும் வெளிப்புற அழுத்தங்களை இலங்கை தாங்கிக்கொள்ள முடியுமா என்பதை மதிப்பிடுவது அவசியம் என்றும் ஜனாதிபதி குறிப்பிட்டுள்ளார். 

அதேவேளை, IMF உடனான அரசாங்கத்தின் ஒத்துழைப்பை நியாயப்படுத்திய அவர், அரசாங்கத்தின் பொருளாதார இலக்குகளுக்கும் தற்போதைய திட்டத்தின் கீழ் ஏற்றுக்கொள்ளப்பட்டுள்ள உறுதிப்பாடுகளுக்கும் இடையில் முரண்பாடுகள் குறைவாகவே காணப்பட்டதாகத் தெரிவித்துள்ளார்.

இதன் காரணமாக, பெரியளவிலான கருத்து வேறுபாடுகள் இன்றி தற்போதைய திட்டத்தைத் தொடர்ந்து நடைமுறைப்படுத்த முடிந்ததாகவும் அவர் கூறியுள்ளார்.

தற்போதைய IMF திட்டம் நிறைவடைய இன்னும் சுமார் ஆறு மாதங்கள் எஞ்சியுள்ளதாகக் குறிப்பிட்ட ஜனாதிபதி, அந்தக் காலப்பகுதியில் கிடைக்கும் பொருளாதார நிலைமைகளை மதிப்பீடு செய்து, IMF உடனான எதிர்கால உறவு குறித்து அரசாங்கம் தீர்மானிக்கும் என்றும் தெரிவித்துள்ளார்.