பொலிஸ் சேவையில் பெரும் சீர்திருத்தம் - புதிய சீருடை விரைவில்
இலங்கை
பொலிஸ் சேவையின் தரமான மேம்பாட்டிற்கு ஏற்ப, பொலிஸ் சீருடைக்கு ஒரு புதிய வடிவமைப்பை அறிமுகப்படுத்துவதற்கான திட்டங்கள் தற்போது தயாரிக்கப்பட்டு வருவதாகவும் பொதுப் பாதுகாப்பு அமைச்சர் ஆனந்த விஜேபால தெரிவித்துள்ளார்.
அத்துடன், வரும் ஆண்டில் பொலிஸ் சேவையில் கூடுதலாக 10,000 அதிகாரிகளைச் சேர்ப்பதற்கான நடவடிக்கைகளும் எடுக்கப்படும் என்று அமைச்சர் உறுதியளித்தார்.
85 ஆவது பொலிஸ் விளையாட்டுப் போட்டியில் கலந்துகொண்டபோது அமைச்சர் இக்கருத்துகளைத் தெரிவித்தார்.
கடந்த ஐந்து ஆண்டுகளாகத் தாமதப்பட்டிருந்த அனைத்துப் பதவி உயர்வுகளும், சிரேஷ்டத்துவம், செயல்திறன், திறனறித் தேர்வுகள் மற்றும் தேர்வு நடைமுறைகள் ஆகியவற்றின் அடிப்படையில் இந்த ஆண்டிற்குள் வழங்கப்படும்.
பதவி நிலை அடிப்படையில் பாகுபாடின்றி, கீழ்நிலை முதல் உயர்நிலை வரையிலான அனைத்துக் பொலிஸ் அதிகாரிகளுக்கும் வெளிநாட்டுப் பயிற்சி வாய்ப்புகளை வழங்குவதற்கான ஒரு நடைமுறையும் உருவாக்கப்பட்டு வருகிறது.
பொலிஸ் அதிகாரிகளின் பணி அர்ப்பணிப்பை அங்கீகரிக்கும் வகையில், 2027-ஆம் ஆண்டுக்கான வரவு-செலவுத் திட்டத்தின் மூலம் விசேட கொடுப்பனவு வழங்க அமைச்சரவை ஒப்புதல் அளித்துள்ளது.
பொலிஸ் அதிகாரிகளுக்கு மின்சார மோட்டார் சைக்கிள்கள் மற்றும் பிற உள்கட்டமைப்பு வசதிகளை வழங்குவதற்கான திட்டங்களும் மேற்கொள்ளப்பட்டு வருவதாகவும் அவர் இதன்போது மேலும் கூறினார்.
