தவறான பாதையில் சென்ற கடத்தல்காரர்கள் - 15 வயது சிறுவர் அதிர்ஷ்டவசமாக மீட்பு

கனடா

கனடாவின் ஒன்டாரியோ மாகாணத்தில், கடத்தல்காரர்கள் காரை தவறான பாதையில் திருப்பியதால், அவர்களின் பிடியிலிருந்த 15 வயது சிறுவர் ஒருவர் அதிர்ஷ்டவசமாக மீட்கப்பட்டுள்ளார்.

இச்சம்பவம் தொடர்பாக இரண்டு நபர்கள் கைது செய்யப்பட்டுள்ளதாக காவல்துறையினர் தெரிவித்துள்ளனர்.

கடந்த செப்டம்பர் 19 ஆம் திகதி இச்சம்பவம் இடம்பெற்றுள்ளது. கடத்தப்பட்ட சிறுவரை ஒரு விடுதிக்கு அழைத்துச் செல்ல கடத்தல்காரர்கள் முயன்றுள்ளனர்.

ஆனால், வழியில் தவறான திருப்பத்தில் சென்று, அமெரிக்க எல்லைக்குச் செல்லும் 'சர்வதேச பாலத்தின்' பகுதிக்குச் சென்றுவிட்டனர்.

அங்கிருந்து மீண்டும் கனடாவுக்குள் நுழைய முயன்றபோது, எல்லைச் சாவடியில் இருந்த கனடா எல்லை பாதுகாப்பு அதிகாரிகள் காரை மறித்து சோதனையிட்டனர்.

காரின் உள்ளே 15 வயது சிறுவர் ஒருவர் கட்டாயப்படுத்தி வைத்திருக்கப்படுவதை அவதானித்த அதிகாரிகள், உடனடியாக காவல்துறையினருக்குத் தகவல் அளித்து இருவரையும் கைது செய்ய உதவினர்.

கைது செய்யப்பட்டவர்கள் சால்ட் ஸ்டீ மேரி பகுதியைச் சேர்ந்த சஹான் ஆலம் மற்றும் சுட்பரி பகுதியைச் சேர்ந்த ஹசன் அல்-மாமுன் என அடையாளம் காணப்பட்டுள்ளனர்.

இவர்கள் இருவரும் கடத்தல் குற்றச்சாட்டின் கீழ் வழக்குப்பதிவு செய்யப்பட்டு காவலில் வைக்கப்பட்டுள்ளனர்.

பாதிக்கப்பட்ட சிறுவரின் அடையாளத்தைப் பாதுகாக்கும் நோக்கில், அவரது பாலினம் அல்லது மேலதிக விவரங்களை காவல்துறை வெளியிட மறுத்துவிட்டது. நீதிமன்றத்தில் இந்த குற்றச்சாட்டுகள் இதுவரை நிரூபிக்கப்படவில்லை என்பது குறிப்பிடத்தக்கது.