இங்கிலாந்தில் பிரபல ஹோட்டலில் பயங்கர தீ விபத்து - நள்ளிரவில் ஓட்டம் பிடித்த சுற்றுலாப் பயணிகள்

இங்கிலாந்தின் புகழ்பெற்ற சுற்றுலா மையமான போக்ஸ்டோன் கடற்கரை ஹோட்டலில் நடந்த இத்தீ வைப்புச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இங்கிலாந்தின் கென்ட் மாகாணத்தில் உள்ள வரலாற்றுச் சிறப்புமிக்க ‘கிராண்ட் பர்ஸ்டின்’ (Grand Burstin) கடற்கரை ஹோட்டலில் ஏற்பட்ட பயங்கர தீ விபத்து தொடர்பாக 21 வயது பெண்ணும் 38 வயது ஆணும் காவல் துறையினரால் கைது செய்யப்பட்டுள்ளனர்.

280க்கும் மேற்பட்ட சுற்றுலாப் பயணிகள் நள்ளிரவில் அலறி அடித்துக்கொண்டு வெளியேறிய இச்சம்பவம் திட்டமிட்டுச் செய்யப்பட்ட சதிச் செயல் (Arson) என விசாரணையில் தெரியவந்துள்ளது.

போக்ஸ்டோன் (Folkestone) துறைமுகப் பகுதியில் அமைந்துள்ள 550 அறைகளைக் கொண்ட இந்த பிரம்மாண்ட ஹோட்டலின் அடித்தளத்தில் (Basement) சனிக்கிழமை அதிகாலை வேளையில் திடீரெனத் தீப்பற்றி எரியத் தொடங்கியது.

நள்ளிரவு நேரத்தில் புகை மூட்டம் சூழ்ந்ததால், ஹோட்டலில் தங்கியிருந்த நூற்றுக்கணக்கான சுற்றுலாப் பயணிகள் உடனடியாகப் பாதுகாப்பான இடங்களுக்கு வெளியேற்றப்பட்டனர். 26 தீயணைப்பு வாகனங்களுடன் சம்பவ இடத்திற்கு விரைந்த தீயணைப்புப் படையினர் பல மணி நேரம் போராடித் தீயைக் கட்டுக்குள் கொண்டுவந்தனர்.

இத்தீ விபத்து தற்செயலாக நடக்கவில்லை என்றும், திட்டமிட்டு வைக்கப்பட்ட தீ என்பதும் முதற்கட்ட விசாரணையில் உறுதியானதைத் தொடர்ந்து கென்ட் காவல் துறை தீவிர விசாரணை மேற்கொண்டது. இதன் அடிப்படையில், உள்ளூர் பகுதியைச் சேர்ந்த 21 வயது இளம் பெண் மற்றும் 38 வயது நபர் ஆகிய இருவரை சந்தேகத்தின் பேரில் போலீசார் கைது செய்து விசாரணைக்குப் பின் பிணையில் விடுவித்துள்ளனர்.

மேலும், கட்டிடம் சேதமடைந்ததால் அருகில் உள்ள குடியிருப்புவாசிகளும் முன்னெச்சரிக்கையாக வெளியேற்றப்பட்டுள்ளனர்.

அதிர்ஷ்டவசமாக இந்த அசம்பாவிதத்தில் யாருக்கும் பெரிய அளவிலான காயங்களோ அல்லது உயிரிழப்போ ஏற்படவில்லை என அதிகாரிகள் தெரிவித்துள்ளனர். சம்பவம் தொடர்பில் கூடுதல் தடயவியல் விசாரணைகளை காவல்துறையினர் தீவிரப்படுத்தியுள்ளனர்.