கண்டியில் அமைந்துள்ள கதிர்காம கோவிலை தெரியுமா?
இலங்கை
இலங்கையின் வரலாற்றுச் சிறப்பு மிக்க நகரமான கண்டியில் அமைந்துள்ள கதிர்காம தேவாலயம் (Kataragama Devalaya), நூற்றாண்டுகளாக பௌத்தர்களும் இந்துக்களும் பக்தியுடன் வழிபட்டு வரும் முக்கிய புனிதத் தலமாகத் திகழ்கிறது.
கண்டி நகரின் வர்த்தக மையமான கொட்டுகொடெல்ல வீதியில் அமைந்துள்ள இந்தத் தேவாலயம், பண்டைய காலத்தில் "கவிகார வீதி" என அழைக்கப்பட்ட பகுதியில் உள்ளது.
கண்டியில் உள்ள நான்கு முக்கிய தேவாலயங்களில் (ஹதர தேவாலயங்கள்) இதுவும் ஒன்றாகும். மற்ற மூன்று தேவாலயங்கள் நாத, விஷ்ணு மற்றும் பத்தினி தேவாலயங்களாகும்.
இந்த நான்கு தேவாலயங்களும் கண்டி அரச மாளிகை (மகா வாசல) மற்றும் ஸ்ரீ தலதா மாளிகையுடன் வரலாற்று ரீதியாக நெருங்கிய தொடர்பைக் கொண்டுள்ளன. அவை நிறுவப்பட்ட காலம் முதல் பௌத்தர்களாலும் இந்துக்களாலும் சமமாக மதிக்கப்பட்டு வருகின்றன.
கண்டியில் உள்ள மற்ற மூன்று தேவாலயங்கள் சிங்கள மரபினரால் நிர்வகிக்கப்படுகின்ற நிலையில், கதிர்காம தேவாலயம் மட்டும் இந்து அர்ச்சகர்களால் நிர்வகிக்கப்படுவது அதன் தனிச்சிறப்பாகும்.
வண்ணமயமான வாசலுடன் அமைந்துள்ள இந்த ஆலயத்தின் கருவறையில் கதிர்காமத் தெய்வத்தின் திருவுருவம் நிறுவப்பட்டுள்ளது.
ஆலயத்தில் பூசைகள் நடைபெறும் மண்டபம், கண்டி எசல பெரஹராவில் பயன்படுத்தப்படும் பல்லக்கு வைக்கப்படும் பகுதி, மேளக்காரர்களுக்கான இடம் உள்ளிட்ட பாரம்பரிய கட்டிட அமைப்புகள் காணப்படுகின்றன.
மேலும், ஆலயத்தின் வட புறத்தில் நவக்கிரகங்களுக்கு அர்ப்பணிக்கப்பட்ட தனி சன்னதியும் அமைந்துள்ளது.
வரலாறு, சமயம் மற்றும் கலாசார மரபுகள் ஒன்றிணையும் முக்கிய புனிதத் தலமாக கண்டி கதிர்காம தேவாலயம் இன்றும் ஆயிரக்கணக்கான பக்தர்களையும் சுற்றுலாப் பயணிகளையும் ஈர்த்து வருகிறது.
கதிர்காமத் தெய்வம் இலங்கையில் மிகவும் பிரபலமான தெய்வங்களில் ஒன்றாகக் கருதப்படுகிறது. அதன் பிரதான ஆலயம் தென்னிலங்கையில் உள்ள கதிர்காமத்தில் அமைந்துள்ளது.
