இன்று தென்னிந்திய சினிமாவின் முன்னணி நடிகைகளில் ஒருவராக திகழும் கீர்த்தி சுரேஷ், தமிழ், தெலுங்கு, மலையாளம் உள்ளிட்ட பல மொழிகளில் தொடர்ந்து வெற்றிப்படங்களில் நடித்து வருகிறார். ஆனால், அவருக்கு முன்பே தென்னிந்திய திரையுலகில் தனக்கென ஒரு இடத்தைப் பிடித்து, ஹிட் படங்களின் நாயகியாக ரசிகர்களின் மனதில் இடம்பிடித்தவர் அவரது தாயார் மேனகா.

கன்னியாகுமரியில் பிறந்த மேனகா, பின்னர் கேரளாவில் குடியேறி அங்கிருந்தே தனது திரைப்பயணத்தை தொடர்ந்தார். 1981ஆம் ஆண்டு இயக்குநர் கே. எஸ். சேது மாதவன் இயக்கிய மலையாள திரைப்படத்தின் மூலம் அறிமுகமான அவர், முதல் படமே வெற்றி பெற்றதால் அதே ஆண்டில் ஏழு மலையாளப் படங்களில் நடிக்கும் வாய்ப்பைப் பெற்றார். இதன் மூலம் மலையாள சினிமாவின் மிகவும் பிஸியான நடிகைகளில் ஒருவராக உயர்ந்தார்.

மலையாளத்தில் அறிமுகமாகும் முன்பே தமிழிலும் தனது தடத்தை பதித்திருந்தார். சிவாஜி கணேசன், சரிதா, ஜெய்சங்கர் நடித்த 'கீழ்வானம் சிவக்கும்' திரைப்படத்தில் ஜெய்சங்கரின் சகோதரியாக நடித்த மேனகாவின் கதாபாத்திரமே படத்தின் முக்கிய திருப்பமாக அமைந்தது.

அதனைத் தொடர்ந்து ரஜினிகாந்த் நடித்த 'நெற்றிக்கண்' திரைப்படத்தில் நடித்தார். அந்தப் படத்தில் ரஜினிகாந்த் தந்தை-மகன் என இரட்டை வேடங்களில் நடித்த நிலையில், தந்தைக்கு லட்சுமி ஜோடியாகவும், மகனுக்கு மேனகா ஜோடியாகவும் நடித்திருந்தார். அந்தப் படத்தில் இடம்பெற்ற "ராமனின் மோகனம்" பாடல் இன்றளவும் ரசிகர்களால் ரசிக்கப்படுகிறது.

பின்னர் விஜயகாந்த் நடித்த 'ஓம் சக்தி', எஸ். ஏ. சந்திரசேகர் இயக்கிய படங்கள், மேலும் மு. கருணாநிதி வசனம் எழுதிய 'தூக்கு மேடை' உள்ளிட்ட பல படங்களில் முக்கிய கதாபாத்திரங்களில் நடித்தார். தொடர்ந்து நிஜங்கள், இனியவளே, நிரந்தரம், நலந்தானா போன்ற பல தமிழ் படங்களிலும் நடித்தார்.

தமிழில் 1986க்குப் பிறகு அதிகமாக நடிக்கவில்லை என்றாலும், மலையாளத் திரையுலகில் தொடர்ந்து முன்னணி நடிகையாக இருந்தார். 1987ஆம் ஆண்டு தயாரிப்பாளர் சுரேஷ் குமார் அவர்களை திருமணம் செய்து கொண்ட பிறகு குடும்ப வாழ்க்கையில் கவனம் செலுத்தி, திரையுலகிலிருந்து நீண்ட இடைவெளி எடுத்தார்.

இரண்டு மகள்களுக்கு தாயான மேனகா, 2011ஆம் ஆண்டு மீண்டும் நடிப்புக்குத் திரும்பினார். பின்னர் மலையாளம் மற்றும் தமிழில் சில படங்களில் நடித்ததுடன், தயாரிப்பாளராகவும் வெற்றி கண்டார். மலையாளத்தில் பத்துக்கும் மேற்பட்ட படங்களை தயாரித்ததோடு, தொலைக்காட்சி தொடர்கள் மற்றும் ரியாலிட்டி நிகழ்ச்சிகளிலும் பங்கேற்றார்.

தற்போது மகள் கீர்த்தி சுரேஷ் தென்னிந்திய சினிமாவின் முன்னணி நடிகையாக திகழ்ந்து வரும் நிலையில், மேனகா திரைப்படங்களில் அதிகம் நடிப்பதில்லை. இருந்தாலும், அவரது பழைய படங்கள் தொலைக்காட்சிகளில் ஒளிபரப்பாகும் போதெல்லாம், அவரது இயல்பான நடிப்பும் திரை வசீகரமும் ரசிகர்களால் இன்றும் கொண்டாடப்பட்டு வருகிறது. 

Murugesan N