கனடாவில் 80,000 ஹூண்டாய் கார்கள் திரும்பப் பெறப்பட்டன

கனடா

காரில் உள்ள பாதுகாப்பு குறைபாடு காரணமாக, கனடாவில் விற்கப்பட்ட 80,000-க்கும் மேற்பட்ட கார்களை ஹூண்டாய் (Hyundai) நிறுவனம் அவசரமாகத் திரும்பப் பெற்றுள்ளது.

காரின் முன்பக்க கேமராவில் உள்ள மென்பொருள் கோளாறு காரணமாக விபத்து ஏற்படும் அபாயம் உள்ளதால் இந்நடவடிக்கை எடுக்கப்பட்டுள்ளது.

கனடா போக்குவரத்துத் துறை வெளியிட்டுள்ள அதிகாரப்பூர்வ அறிவிப்பில், இந்த சாஃப்ட்வேர் கோளாறு காரணமாக காரின் தானியங்கி பிரேக் சிஸ்டம் தவறாகச் செயல்பட வாய்ப்புள்ளதாகத் தெரிவிக்கப்பட்டுள்ளது.

பாதிக்கப்பட்ட வாகனங்களில் உள்ள முன்பக்க கேமரா மென்பொருள் கோளாறு காரணமாக, காரின் 'ஃபார்வர்டு கொலிஷன் அவாய்டன்ஸ்' தொழில்நுட்பம் பாதிக்கப்படுகிறது.

சாலையில் முன்னால் எந்தவித விபத்து அபாயமும் இல்லாத சூழலிலும், இந்த கோளாறு காரணமாக கார் திடீரென தானாகவே பிரேக் பிடித்து நின்றுவிடுகிறது.

அதிவேகமாகச் செல்லும் சாலையில் கார் இப்படி திடீரென நின்றால், பின்னால் வரும் வாகனங்கள் மோதி கடுமையான விபத்துகள் ஏற்பட வாய்ப்புள்ளது.

கனடாவில் திரும்பப் பெறப்படும் 80,000 வாகனங்களில் பின்வரும் மாடல்கள் அடங்கும்:

• ஹூண்டாய் சாண்டா குரூஸ் (Hyundai Santa Cruz): 2025-ஆம் ஆண்டில் தயாரிக்கப்பட்ட மாடல்கள்.

• ஹூண்டாய் டியூசான் (Hyundai Tucson): 2025 மற்றும் 2026-ஆம் ஆண்டுகளில் தயாரிக்கப்பட்ட மாடல்கள். (இதில் 2026 மாடலின் பெட்ரோல், ஹைப்ரிட் (HEV) மற்றும் பிளக்-இன் ஹைப்ரிட் (PHEV) ஆகிய அனைத்து ரகங்களும் அடங்கும்).

பாதிக்கப்பட்ட கார் உரிமையாளர்களுக்கு ஹூண்டாய் நிறுவனம் நேரடியாகக் கடிதம் மூலம் தகவல் அனுப்பும். அவர்கள் தங்களது காரை அருகில் உள்ள டீலர்ஷிப்பிற்கு எடுத்துச் சென்று, முன்பக்க கேமரா சாஃப்ட்வேரை முற்றிலும் இலவசமாகப் புதுப்பித்துக் கொள்ளலாம் என அறிவிக்கப்பட்டுள்ளது.