சிவாஜி - நாகேஷ் கூட்டில் அரங்கேறிய நடிப்புப் பேயாட்டம்

சினிமா

நடிப்புலகின் தச்சன், நடிகர் திலகம் சிவாஜி கணேசன் அவர்களின் சிம்மாசனப் படங்களில், நகைச்சுவை என்ற பெயரில் அரங்கேறிய ஒரு நடிப்புப் பேயாட்டம்தான் நாகேஷ்! அவர் வெறும் காமெடியன் அல்ல; கதையின் உயிரை உருவி, அதில் தன் ரசாயனத்தை ஊற்றி, ரசிகர்களின் மனதைக் குதூகலத்தால் கட்டிப் போட்ட ஒரு மாயவித்தைக்காரன்!

சிவாஜியின் கம்பீர ஆளுமைக்கு நடுவே, தன் துள்ளும் உடல்மொழியாலும், அனல் தெறிக்கும் வசனங்களாலும், திரையின் ஒளியைத் தன் பக்கம் இழுத்த 'சகுனி'யின் சாயல் அவருக்கே உரியது. அவர் திரையில் தோன்றினால், அது வெறுமனே சிரிப்பலைகள் அல்ல; எதிர்பாராத திருப்பங்களால் நிரம்பிய ஒரு வெடிகுண்டு வெடிப்பு!

சவாலே சமாளி: தீப்பிழம்பின் திருவிளையாடல்!
'சின்னப்பண்ணை சிங்காரம்' – இந்தக் கதாபாத்திரத்தை ஒரு வில்லனாகப் பார்ப்பதா, அல்லது நகைச்சுவை எனும் போர்வையில் இயங்கும் ஓர் அபாயகரமான சூழ்ச்சிக்காரனாகப் பார்ப்பதா? நாகேஷ் அளித்த அலப்பறை, இந்தக் கேள்வியை எழுப்பியது.
அவர் ஒரு பற்ற வைத்த திரி!
பண்ணையார் (பகவதி) vs சிவாஜி மோதலில், நடுவே புகுந்து, "பண்ணையாரு தோத்தாருன்னா அவரு பொண்ணை கட்டி குடுங்கன்னு கேக்கிறாப்ல இருக்கே" என்று ஒரு வார்த்தையைப் போடுவார் பாருங்கள் – அது வெறும் வசனம் அல்ல; ஒட்டுமொத்தப் படத்தின் அஸ்திவாரத்தையே ஆட்டங்காணச் செய்த ராஜதந்திரம்! அந்தத் தீயைத் தான் பற்ற வைத்ததாகக் கூறி, வெற்றியில் அவர் காட்டும் அந்த அட்டகாசம்... அது அடங்காத ஒரு அக்னியின் குதிப்பைப் போன்றது!

எட்டணா எலுமிச்சம் பழத்தை வைத்தே சகுனியாட்டம் ஆடி தன் வலைக்குள் சிக்க வைக்கும் வைத்தியாரை சொல்லாத நாகேஷ் திரைவரிசையா?
அவர் வாயில் இருந்து வரும் ஒவ்வொரு வார்த்தையும், "மரியாதையா! அதைப்பத்தி எனக்கென்ன? கவலைப் படறதே இல்லை" என்பது போல, தான் ஏற்றுக்கொண்ட கதாபாத்திரத்தின் அலட்சியத்தையும், மிரட்சியான தன்னம்பிக்கையையும் கண்முன்னே நிறுத்தும்!

திருவிளையாடல்: தருமி பேசிய அதிர் வேட்டு..
சிவாஜியின் செந்தமிழ் உச்சரிப்புக்கு நடுவே, 'தருமி'யாக நாகேஷ் நடத்திய ரகளை, தமிழ் சினிமா கண்டிராத ஒரு துணிச்சலான நாடகம்!
"எங்கெங்கே வீங்கி இருக்குன்னா?" என்று சிவபெருமானையே (சிவாஜி) ஒரு நொடி திகைக்க வைத்த அந்தப் பஞ்ச், தெய்வீகக் காட்சியின் புனிதத்தைக் கலைத்து, தியேட்டரையே சிரிப்பால் அதிரச் செய்தது! இந்த நடிப்பு அராஜகத்தைத்தான் சிவாஜியே பார்த்து, "இந்தக் காட்சிகளைக் கட் செய்யாதீர்கள்" என்று நாகேஷின் மீதான தன் பிரம்மாண்டமான மரியாதையை வெளிப்படுத்தினார்! நக்கீரன் சபையில் அவர் பேசிய நக்கல் வசனங்கள் இன்றும் 'மீம்ஸ்' வடிவத்தில் காலத்தை வென்று கர்ஜிக்கின்றன!

அன்னை இல்லம்: மின்னல் வேகத்தின் மாயாஜாலம்!
'லூசுத்தனமான' கதாபாத்திரம் என்றாலும், அதில் நாகேஷ் காட்டிய வேகம், ஒரு மின்னல் வெட்டிற்குச் சற்றும் குறையாதது! கண்ணாடி டம்ளர் நழுவி, கீழே விழும் ஒரு வினாடியில், அதை இன்னொரு கையால் லாவகமாகப் பிடிக்கும் அந்தச் சாகசம் – அது வெறும் நடிப்பு அல்ல; உடல்மொழியால் நிகழ்த்தப்பட்ட ஒரு திக் ஷாக்!
நாய் துரத்தும்போது பைப்லைன் பிடித்து மாடிக்குத் தாவுவது, நிழலைப் பார்த்துப் பயந்து பீரோ மேல் தாவி ஒடுங்குவது... இந்தப் பரபரப்பான காட்சிகள், நாகேஷின் கட்டுப்பாடற்ற ஸ்பீடு நடிப்பின் உச்சகட்ட அடையாளம்!

காம்போ க்ளைமாக்ஸ்: குணச்சித்திரத் தீ!
நகைச்சுவையில் மட்டுமே தன் எல்லையை நிறுத்திக் கொள்ளாமல், தியாகம் படத்தில் அவர் ஏற்று நடித்த முஸ்லீம் கதாபாத்திரம், ரசிகர்களின் கண்களில் இருந்து நீரைக் கசிய வைத்தது. அந்த வேடத்தில் அவர் காட்டிய உணர்வுப் பூர்வமான நடிப்புத் தீ, "நாகேஷ் ஒரு காமெடியன் அல்ல, அவர் ஒரு அபூர்வப் பிறவி நடிகர்!" என்ற உண்மையை உலகம் உணரச் செய்தது!

சிவாஜியின் படங்களில் நாகேஷ் நிகழ்த்திய அலப்பறை, வெறும் சிரிப்பலைகள் அல்ல; அது நடிப்பு வரலாற்றில் ஆழமாகப் பதிக்கப்பட்ட ஒரு மிரட்சியான முத்திரை!

செந்தில்வேல் சிவராஜ்