மயக்கமென்ன.. இந்த மெளனமென்ன.. 

சினிமா

மயக்கமென்ன.. இந்த மெளனமென்ன.. அம்மா இறந்த துக்கத்திலும் டூயட் பாடிய சிவாஜி.. நீதிபதியின் வீட்டுக்கே சென்று கேட்ட சந்தேகம்.. அர்ப்பணிப்பு நடிகர்..!

நடிகர் திலகம் சிவாஜி கணேசன் வெறும் நடிகர் மட்டுமல்ல, அவர் ஒரு நடமாடும் நடிப்பு பல்கலைக்கழகம். ஒவ்வொரு காட்சியிலும் தான் ஏற்றுக்கொண்ட கதாபாத்திரமாகவே மாறிவிடும் அற்புதம் அவருக்கு மட்டுமே சாத்தியமானது. தனது வாழ்நாள் முழுவதும் நடிப்புக்கு மட்டுமே தன்னை அர்ப்பணித்துக் கொண்ட சிவாஜி, படப்பிடிப்பு தளத்தில் நடந்த பல சுவாரஸ்யமான, சில நேரங்களில் ஆச்சரியமான நிகழ்வுகளுக்கு மையமாக இருந்துள்ளார்.

’தங்கப்பதக்கம்’ திரைப்படத்தில் ஒரு காட்சியில், தனது மனைவி இறந்து கிடப்பதை பார்த்து சிவாஜி கணேசன் பேச வேண்டிய வசனங்களில், ‘ஓவர் ஆக்டிங்’ ஆக இருக்கக்கூடாது என்பதில் அவர் மிகவும் கவனமாக இருந்தாராம். மகேந்திரன் எழுதிய வசனங்களுக்கு அவர் எதார்த்தமான நடிப்பை வெளிப்படுத்தியதாக கூறப்படுகிறது. இந்த ஆர்வம், ஒரு காட்சியை செதுக்குவதில் அவர் எவ்வளவு நுட்பமாக இருப்பார் என்பதை காட்டுகிறது.

சிவாஜியின் நடிப்பு அர்ப்பணிப்பிற்கு சிறந்த உதாரணங்களில் ஒன்று “வசந்த மாளிகை” படத்தின் படப்பிடிப்பின் போது நடந்தது. இந்த படத்தின் படப்பிடிப்பு நடந்து கொண்டிருந்த நேரத்தில், சிவாஜி கணேசனின் தாயார் ராஜாமணியம்மாள் காலமானார். தாயின் மரணம் என்பது யாருக்கும் தாங்க முடியாத துயரம். ஆனால், 16 நாள் காரியம் முடிவதற்கு முன்பே சிவாஜி படப்பிடிப்புக்கு வந்துவிட்டார். இதை பார்த்த படக்குழுவினர் அதிர்ச்சியடைந்து, “ஏன் அதற்குள் படப்பிடிப்புக்கு வந்தீர்கள்?” என்று கேட்டபோது, வீட்டில் இருந்தால் தாயாரின் நினைவுகள் மட்டுமே வருகிறது, அதனால் தான் படப்பிடிப்பில் கலந்து கொள்ள வந்ததாக சோகமாக தெரிவித்துள்ளார். அப்படி அந்த நேரத்தில் எடுக்கப்பட்ட பாடல் தான் “மயக்கம் என்ன.. மௌனம் என்ன” என்ற பாடல். அளவுகடந்த சோகத்தை தன்னுள் வைத்து கொண்டும், தான் செய்ய வேண்டிய வேலையையும் சரியாக செய்துவந்த அவரது அர்ப்பணிப்பு, படக்குழுவினரையும் ரசிகர்களையும் வியப்பில் ஆழ்த்தியது.

விசித்திரமான சம்பவங்கள்: “டேய் நான் சிவாஜிடா… எதுக்குடா நடக்க சொல்ற!”

பாரதிராஜாவுடன் ஒருமுறை வாக்குவாதம் நடந்த சம்பவமும் சிவாஜியின் தனித்துவமான இயல்பை வெளிப்படுத்தும். பாரதிராஜா, ‘முதல் மரியாதை’ படத்தை இயக்கியபோது சிவாஜியிடம் காட்சியை விளக்காமல் ‘சூரியன் மறைய போகிறது சார், சீக்கிரம் நடங்க, ஒரு ஷாட் எடுக்கனும்’ என்று சொன்னார். ‘டேய் நான் சிவாஜிடா… எதுக்குடா நடக்க சொல்ற!’ என்று பாரதிராஜாவிடம் சிவாஜி கேட்டபோது, அதற்கு பதில் சொல்லாமல் சீக்கிரம் நடங்க, ஒரே ஒரு நிமிஷம் நடங்க போதும் என்று சொன்னதாக கூறப்படுகிறது.

‘பாபு’ என்ற படத்தில் ரிக்‌ஷா இழுக்கும் காட்சியில் ‘டூப்’ போடாமல் தானே நடித்தார் சிவாஜி. காட்சி முடிந்ததும் தனது மார்பை பிடித்துக்கொண்டு கீழே சரிய, படக்குழு அதிர்ச்சியடைந்தது. பழக்கமில்லாத வேலையை செய்ததால் இப்படி ஆகிவிட்டது என்று சாதாரணமாக சொல்லிவிட்டு, அடுத்த காட்சி குறித்து கேட்டாராம். இது அவரது உடல் ரீதியான அர்ப்பணிப்புக்கு சிறந்த உதாரணம்.

‘பாவமன்னிப்பு’ படத்தில் முஸ்லிம் இளைஞர் கதாபாத்திரத்தில் நடித்தபோது, சிவாஜிக்கு ஒரு சந்தேகம் வந்தது. முஸ்லிம் என்பதால் தூய தமிழில் பேச வேண்டுமா அல்லது ஒரு குறிப்பிட்ட வட்டார வழக்கில் பேச வேண்டுமா என்று தெரியவில்லை. இந்த சந்தேகத்தைத் தீர்த்துக்கொள்ள, ஒரு இஸ்லாமிய நீதிபதையை சந்தித்து, “ஐயா, நான் முஸ்லிம் இளைஞர் பாத்திரம் ஏற்று நடிக்கின்றேன். இந்த வேடத்திற்கு ஏற்றார்போல் ‘ஸ்லாங்காக’ பேச வேண்டுமா அல்லது நல்ல தமிழிலேயே பேச வேண்டுமா?” என்று கேட்டாராம். பொறுமையாக கேட்ட நீதிபதி, “முஸ்லிம் பாத்திரங்களில் நடிக்கும்போது தாராளமாக எல்லோரும் உரையாடுவதுபோல இயல்பாகவே நீங்கள் பேசலாம். நல்ல தமிழில் பேசுவது எங்கள் சமுதாயத்திற்கு நீங்கள் செய்கிற பெருமை” என்று கூறியுள்ளார். நெகிழ்ந்துபோன சிவாஜி கணேசன் அப்படியே செய்வதாக நன்றி பெருக்கோடு கூறினார். இந்த சம்பவம், ஒரு கதாபாத்திரத்தின் நுணுக்கமான உச்சரிப்பு மற்றும் கலாச்சார பிரதிநிதித்துவம் பற்றிய அவரது கவனத்தை காட்டுகிறது.

சிவாஜி கணேசன் ஒரு நடிகராக மட்டுமல்லாமல், தனது துறையின் மீது அசாத்தியமான பற்று கொண்ட ஒரு கலைஞராகவும் இருந்தார். அவரது படப்பிடிப்புத் தள அனுபவங்கள் அனைத்தும், அவரது நடிப்பின் மீதான தீராத தாகத்தையும், ஒரு காட்சியின் பரிபூரணத்திற்காக அவர் எத்தகைய அர்ப்பணிப்பையும் கொடுக்க தயங்க மாட்டார் என்பதையும் தெளிவாக எடுத்துரைக்கின்றன.

தமிழச்சி கயல்விழி