கின்னஸ் சாதனை பேரரசி..இன்று வரை முறியடிக்கப்படாமல் முனை மழுங்காத சாதனை சாம்ராஜ்யத்தின் பன்முக மகாராணி.

சினிமா

கின்னஸ் சாதனை பேரரசி..இன்று வரை முறியடிக்கப்படாமல் முனை மழுங்காத சாதனை சாம்ராஜ்யத்தின் பன்முக மகாராணி.
அவர்தான் செம்மீன் ஷீலா.
இவரும் நடிகர் பிரேம் நசீரும் இணைந்து 130 படங்களில் நடித்திருக்கிறார்கள். எத்தனையோ சாதனைகள் படைத்தவர்கள் பட்டயங்கள் வாங்கியோர் இருக்கிறார்கள்.
எனக்குத் தெரிந்த வரை இந்திய திரை உலகில் ஷீலா-பிரேம்நசீர் சாதனையை முறியடித்தவர் எவரும் இல்லை, என்றே சொல்வேன். கின்னஸ் சாதனையாளரை அன்றே உலகம் பாராட்டி விட்டது.
திரை உலகில் காதல் வயப்படுவது என்பது புதிதல்ல.அது அரிதும் அல்ல. .100 நாள் நடக்கும் பிக்பாஸ் நிகழ்வுகளிலேயே காதல் வயப்படுவது எளிது என்றாகி விட்ட காலம் இது. சினிமாவும் அப்படித்தான்.
கட்டைப் பிரம்மச்சாரியையும் காதலிப்பார்கள். கெட்டி குடும்பஸ்தனையும் காதலிப்பார்கள்
நடிகர் ரவிச்சந்திரன் -ஷீலா இருவரும் காதலித்தார்கள். கல்யாணமும் செய்து கொண்டார்கள். இதைத்தான் கவியரசர் “நான் என்றும் நீ என்றும் ஏன் சொல்வது?நான் வேறோ,? நீ வேறோ யார் சொன்னது? நீயாகி நானாகி நாம் ஆனோம்”.என்று சொன்னார். இவர்களுக்குப் விஷ்ணு பிறந்தார்.
ஆண்டவன் ஷீலா -ரவிச்சந்திரன் வாழ்க்கையிலும் விளையாடிவிட்டான்.
மகிழ்ச்சியுடன் குடும்பம் நடத்தி குழந்தை பெற்றுக் கொண்ட அவர்களின் வாழ்க்கையில் குறுக்கிட்டான். குதர்க்கம் விளைவித்தான்.
விளைவு ?
பிரிவு! மனமுறிவு மண வாழ்க்கையை உடைத்துப் போட்டது. மகன் விஷ்ணுவுடன் ஷீலா வாழ்ந்தார். தனிமையை அனுபவித்து வாழ அவர் ஒன்றும் துறவி அல்லவே! அவருக்கும் மணவிழா நடந்தது.
விஷ்ணு வின் பெயரில் ஜார்ஜ் சேர்ந்து கொண்டது.
வயதானாலும் திரை உலகில் இவர்கள் நீடித்தார்கள்.

காலம் வேகமாக நடந்தது காலனும் வேகமாக சேர்ந்தே நடந்தான்.
ரவிச்சந்திரன் அப்போலோ மருத்துவமனையில் அனுமதிக்கப்பட்டார்.
ஐ.சி.யூ வில் இருந்த அவரின் உயிர் பிரிவதாக இல்லை.
எதோ ஒரு ஏக்கம் அவர் முகத்தில் தெரிவதாக உடன் இருந்தவர்களே பேசிக் கொண்டார்கள்.
அவரது கடைசி ஆசையை சொல்லும் நிலையில் இல்லையே!
பத்திரிகையாளர்கள் அப்பல்லோவுக்கு வழக்கம் போல வந்து சென்றார்கள்.
ரவிச்சந்திரன் குடும்பத்தினருக்கு சொல்ல முடியாத துயரம். அமைதியுடன் இறைவனடி சேரவேண்டும் என பிரார்த்தனை செய்தார்கள். குடும்பத்தினருக்கு வேண்டிய உறவினர்கள்,நண்பர்கள் வந்து போனார்கள் அப்படி வந்தவர்களில் தயாரிப்பாளர் ஏ.எல்.எஸ் கண்ணப்பனின் மனைவி ஜெயந்தி கண்ணப்பனும் ஒருவர்.
“ஏம்மா அவரது கடைசி ஆசை ஜார்ஜை பார்க்க விரும்புவதாக இருக்குமோ?”
“இருந்தாலும் இருக்கலாம்.ஆனால் அவரை அவரது அம்மா அனுப்புவாங்களா ?”
“எதையும் கேட்காமல் முடிவு கட்டாதிங்க.கேட்டுப் பார்க்கலாமே?”
“யார் போய் கேட்பது?”
-இப்படியாக பெண்கள் பேசிக்கொண்டார்கள். ஜெயந்தி கண்ணப்பன் காதிலும் விழுந்தது.
“நான் போய் கேட்கவா?”என்று கேட்டார் ஜெயந்தி அம்மாள்.
ரவிச்சந்திரன் குடும்பத்தின் முழு சம்மதம் கிடைத்தது.இதன்பின்னர் என்ன நடந்தது?
திருமதி ஜெயந்தி கண்ணப்பனிடம் கேட்டேன்.
“அவர்கள் சம்மதம் சொன்னதும் நான் ஷீலா அக்காவிடம் பேசினேன். அவர் மனம் மிகவும் கலங்கிப் போய் விட்டது.. ஜார்ஜ் அவரது மகன் .அவரை பார்க்க வேண்டாம் என நான் சொல்ல மாட்டேன். ஆனால் ஜார்ஜை நீதான் கூட்டிக் கொண்டுபோகணும். சரியா?”என்று ஷீலா கேட்டார். நானும் சரி சொல்லி விட்டு அழைத்துச் சென்றேன்.
அப்பாவைப் பார்த்ததும் ஜார்ஜ் ரொம்பவுமே உடைந்து போனான். டாடி டாடி என்று கையைப் பிடித்துக் கொண்டு அழுதான்.
அப்போதுதான் நாங்கள் அந்த அதிசயத்தைப் பார்த்தோம். ரவிச்சந்திரனின் ஒரு கண்ணில் இருந்து நீர் வடிந்தது. முகத்திலும் மாற்றம் இருந்தது. ஐசியூவில் இருந்து வெளியில் வந்ததும் ரவியின் குடும்பத்தினர் அனைவரும் ஒன்று சேர்ந்து ஜார்ஜின் கையைப் பற்றிக் கொண்டார்கள். இதற்கு இரண்டு நாள் கழித்து ரவியின் உயிர் பிரிந்து விட்டது” என ஜெயந்தி சொன்னார்.
அப்படியானால் ஆன்மா இருப்பது உண்மைதானா?
இன்று ஷீலா அவர்களின்
பிறந்தநாள்