உர மானியம் பெற்றுக் கொள்ளும் விவசாயிகளுக்கு முக்கிய அறிவித்தல்
இலங்கை
உர மானியங்களை பெற்றுக்கொள்ளும் விவசாயிகள் விளைச்சலின் போது அறுவடையில் ஒரு பகுதியை அரசாங்கத்திற்கு வழங்க வேண்டும் என விவசாய அமைச்சர் கே.டி. லால்காந்த தெரிவித்துள்ளார். ஆனால், இதுதொடர்பாக இறுதித் தீர்மானம் எடுக்கப்படவில்லை என்றும் பேச்சுவார்த்தைகள் ஆரம்பிக்கப்பட்டுள்ளதாகவும் அவர் குறிப்பிட்டுள்ளார்.
இந்த விடயம் தொடர்பாக கருத்து வெளியிட்டுள்ள விவசாய அமைச்சர் கே.டி. லால்காந்த, ”விவசாயத்திற்கு தேவையான நீரை அரிசி ஆலை உரிமையாளர்கள் வழங்குவதில்லை எனவும் அது இந்த நாட்டு மக்களது வரிப்பணத்தில் வழங்கப்படுவதாகவும்” சுட்டிக்காட்டியுள்ளார்.
மேலும், நெல் விற்பனைச் சபையானது, மக்களுக்கு சேவையாற்ற முயன்று வரும் நிலையில் விவசாயிகளும் சமூகத்திற்கு பொறுப்புக்கூற வேண்டியவர்கள் என அமைச்சர் சுட்டிக்காட்டியுள்ளார்.
எனவே, எதிர்க்காலத்தில் உர மானியங்களை பெற்றுக்கொள்ளும் விவசாயிகள் விளைச்சலின் போது அறுவடையில் ஒரு பகுதியை அரசாங்கத்திற்கும் வகையில் நடவடிக்கை மேற்கொள்ளப்படும் என்றும் அவர் தெரிவித்துள்ளார்.
எனினும், அவ்வாறான தீர்மானம் தற்போது மேற்கொள்ளப்படவில்லை என்ற போதிலும் எதிர்காலத்தில் விவசாயிகளின் விளைச்சலில் ஒரு பகுதியை பெற்றுக்கொள்வதற்காக பேச்சுவார்த்தைகள் முன்னெடுக்கப்பட்டு வருவதாகவும் அமைச்சர் கே.டி.லால்காந்த தெரிவித்துள்ளார்.
அதேநேரம், கடந்த வருடம் நவம்பர் மாதம் வெள்ளத்தினால் பயிர்கள் சேதமடைந்த விவசாயிகளுக்கான நட்டஈடு இன்று முதல் வழங்கப்படவுள்ளதாக விவசாய மற்றும் கமநல காப்புறுதி சபை தெரிவித்துள்ளது. அதற்கமைய, பொலன்னறுவை, முல்லைத்தீவு, வவுனியா மற்றும் திருகோணமலை ஆகிய மாவட்டங்களில் இந்த நட்டஈடு வழங்கப்படவுள்ளதாக குறித்த சபையின் தலைவர் தெரிவித்துள்ளார்.
அதன்படி, பயிர்கள் சேதமடைந்த விவசாயிகளின் கணக்கில் நட்டஈட்டுத் தொகையை வைப்பிலிட நடவடிக்கை எடுக்கப்பட்டுள்ளதாகவும் அவர் குறிப்பிட்டுள்ளார். குறித்த கொடுப்பனவுகள், 13, 379 ஏக்கருக்குரிய நெல் பயிர் செய்கை விவசாயிகளுக்கு மாத்திரமே வழங்கப்படும் என்றும் அவர் மேலும் தெரிவித்துள்ளார்.
