ரணிலின் கையொப்பத்துடனான கடிதம் - விசாரணையை ஆரம்பித்த சிஐடி

இலங்கை

முன்னாள் ஜனாதிபதி ரணில் விக்கிரமசிங்கவின் கையொப்பத்துடன் பாதுகாப்பு நிறுவனங்களுக்கு அனுப்பப்பட்டதாகக் கூறப்படும் கடிதம் தொடர்பில் விசாரணைகள் ஆரம்பிக்கப்பட்டுள்ளதாக குற்றப் புலனாய்வுத் திணைக்களம் (CID) கொழும்பு கோட்டை நீதிவான் நிலுபுலி லங்காபுரவிடம் அறிவித்துள்ளது.

தென் மாகாணத்தில் செயற்படும் ஆட்கடத்தல்காரர் ஒருவரை தொடர்ந்து சட்டவிரோதமான செயற்பாடுகளில் ஈடுபட அனுமதிக்கும் விசேட உத்தரவு இக் கடிதத்தில் அடங்கியுள்ளதாக தெரிவிக்கப்பட்டுள்ளது.

கடிதம் முன்னாள் பொலிஸ் மா அதிபர் சி.டி. விக்ரமரத்ன, அப்போதைய பாதுகாப்பு செயலாளர் மற்றும் ஜனாதிபதி செயலாளர் ஆகியோருக்கு அனுப்பப்பட்டதாகக் கூறப்படுகிறது.

இந்தக் கடிதம் உண்மையானதா அல்லது போலியானதா என்ற விசாரணையை சிஐடியினர் ஆரம்பித்துள்ளனர்.

இந்த ஆவணம் மாத்தறை தபால் நிலையத்தின் ஊடாக அனுப்பப்பட்டுள்ளதாக தெரிவிக்கப்பட்டுள்ளதுடன், முன்னாள் பொலிஸ் மா அதிபரும் இந்த விடயம் தொடர்பில் உள்ளக விசாரணைக்கு உத்தரவிட்டுள்ளார்.

கடிதத்தின் நம்பகத்தன்மையை கண்டறிந்து நீதிமன்றில் அறிக்கை சமர்ப்பிக்குமாறு நீதிவான் விசாரணை அதிகாரிகளுக்கு பணிப்புரை விடுத்துள்ளார்.