இசையும் கதை சொல்லும் நேர்த்தியும் கைகோர்த்து எப்படி ஒரு அற்புதமான திரைப்படம் உருவாகும் என்பதற்கு சாட்சிதான் இந்த சங்கராபரணம் திரைப்படம்.
பாரம்பரியத்தை கடைபிடிக்கும் தூய்மைவாதியான இசை கலைஞர் சங்கர சாஸ்திரிகள்(வி சோமயாஜுலு) தன்னை குருவாக மதிக்கும் ஓர் மாதரசி துளசிக்கு ( மஞ்சு பார்கவி) அடைக்கலம் கொடுக்கிறார். அதையும் எப்போது கொடுக்கிறார் ? வேசியின் மகளாக இருந்தாலும் மாசற்ற மாணிக்கமாக இருந்தவள் கயவன் ஒருவனால் கெடுக்கப்படுகிறாள் . இதற்கு அவள் தெய்வ தாயும்" உடந்தை .
கெடுத்த வில்லன் கெடுத்தது லாபம் என்று பேசாம போகாமல் இலவச இணைப்பாக அவள் தெய்வமாக மதிக்கும் சங்கர சாஸ்திரிகளை அவமதித்து அவர் படத்தை எட்டிட்டு உதைக்க வெறியான மஞ்சு பார்கவி உடைந்த கண்ணாடி துண்டால் அவனை சதக் சதக்'கி விடுகிறாள் . அப்போது நடந்த உண்மையை சொல்லி சங்கர சாஸ்திரிகளிடம் அடைக்கலம் ஆகிறாள் .
இதிலென்னங்க தப்பு இருக்கு ? சொல்லுங்க.. அதெப்படி ஊருக்குள் பெத்த” பேருடன் இருக்கும் சாஸ்திரிகள் இப்படி செய்யலாமா " என்று அவரை ஊர் மக்கள் எப்போதும் செய்வது போலவே ஊரை விட்டு ஒதுக்கி வைத்து விடுகிறார்கள் . புகழ் போச்சு , மரியாதை போச்சு , கச்சேரி போச்சு , என்று அவர் பொருளாதார சுருதி இறங்கி விடுகிறது .
தன்னால் சாஸ்திரிகள் அவமானப்படுவதை கண்ட மஞ்சு பார்கவி அவர் வீட்டை விட்டு வெளியேறி விடுகிறாள் . இதனால் மான மரியாதை திரும்ப வந்தாலும் பொருளாதாரம் மேம்படவில்லை . மேல் நாட்டு பாப் இசையிலும் மக்களின் ரசனையும் மாற்றம் பெற சாஸ்திரிகள் மவுசு குறைந்து வறுமையில் தான் உழல்கிறார் .இதன் பின்னர் நடக்கும் சம்பவங்களும் திருப்பங்களும் தான் மீதி படம் .

இயக்குனர் கே விஸ்வநாத்துக்கு சங்கர சாஸ்திரிகள் வேடத்திற்கு முதலில் நாகேஸ்வர ராவ் தான் முதல் தேர்வாக இருந்து இருக்கிறது . பின்னர் அது நடக்காமல் போக அவருக்கு அந்த வேடத்திற்கு நடிகர் திலகத்தை அணுகலாம் என்ற எண்ணமும் இருந்ததாம் . அதுவும் நிறைவேறாமல் போக அவர் வி சோமயாஜுலுவை நடிக்க வைத்து இருக்கிறார். சரியான தேர்வுதான் . அந்த கதாபாத்திரத்திற்கு எந்த ஒரு ஸ்டார் இமேஜும் இல்லாது இருப்பதுதான் சிறப்பு .
இதே மாதிரி இந்த படம் முழுக்க முழுக்க கர்நாடக இசையை அடிப்படையாகக் கொண்ட படம் என்பதால் முதலில் பிரபல கர்நாடக பாடகர் பாலமுரளி கிருஷ்ணாவை தான் அணுகி இருக்கிறார்கள் . அவரோ 'சங்கீதமா.. அதை நான் பாட இன்றொரு நாள் போதுமா ' என்று அசால்ட்டாக திரைப்படங்களில் பாட அதிகம் ஆர்வம் காட்டாததால் எஸ் பி பி அவர்களை பாடல்களுக்காக தேர்வு செய்தனர் .
படத்தில் மொத்தம் 10 பாடல்கள். அதில் ஒன்பது பாடல்களை பாடியிருந்தார் SPB, இந்த பட பாடல்தான் எஸ்.பி. பாலசுப்ரமணியத்துக்கு முதல் தேசிய விருதை பெற்று தந்தது . சூப்பர் ஹிட்டான இந்த படத்துக்கு பல சர்வதேச விருதுகளும் . நான்கு தேசிய விருதுகளும் கிடைத்தன. கே வி மஹாதேவன் தந்த சூப்பர் மியூசிக்கல் ஹிட் இது. .
படத்தில் ஏகப்பட்ட "இயக்குனர் தொடல்" காட்சிகள் நிறைய உண்டு . தன்னை கெடுத்தவன் குருதி கொண்டு தன் தேவுடு சங்கர சாஸ்திரிகள் பாதத்தை மஞ்சு பார்கவி கழுவுவதும் இறுதி பாடலில் டாக்டரை அழைத்து வரும் சந்திரமோஹனை பார்த்து முடியாமல் இருக்கும் சோமயாஜுலு வேண்டாம் என்று கையமர்த்துவதும் என்று ஏகப்பட்ட காட்சிகள் .
நாயகி மஞ்சு பார்கவி பாந்தமான நடிப்பு . நடிப்போடு துடிப்பான நாட்டியமும் ஆடுகிறார் . அதிலும் ஆரம்ப பாடலில் சாஸ்திரிகள் சபா மேடையில் பாட இவர் உட்கார்ந்துகொண்டே இரு கைகளில் நடன அபிநய முத்திரை காட்டுவது அழகு என்றால் .சாஸ்திரிக்கே தெரியாமல் அவர் பாடலின் உந்துதலால் இவர் அந்த ஆற்றங்கரையில் நடனமாடுவது பேரழகு.
பாக்யலட்சுமியோட (விஜய் டீவி ) மாமியார் ராஜலட்சுமியை குண்டு கண்களோடு சங்கர சாஸ்திரிகள் மகளாக இளமையாக காண முடிகிறது . இப்போதைய அம்மா’ நடிகை துளசி சங்கரன் " வேடத்தில் குழந்தை நட்சத்திரம்.
படம் தமிழ்நாட்டில் ஏகத்துக்கும் பிய்த்து கொண்டு ஓடியது . அந்த வயதில் படத்தின் சிறப்பு தெரியாததால் இந்த கர்நாடக கச்சேரி படத்துக்கு இவ்வளவு வரவேற்பா? என்று நான் வியந்துதுண்டு . பின்னாட்களில் தான் படத்தின் அருமை தெரிந்தது . சோமயாஜீலுவை கே விஸ்வநாத் ன்னு நான் நினைச்ச காலம் அது . பெரியவங்க எல்லாரும் கே விஸ்வநாத் படம்ன்னு சொன்னாங்க . அதான் .!
சென்னையில் எந்த தியேட்டர் என்று நினைவு இல்லை . சத்தியம் காம்ப்ளெக்ஸில் உள்ள சுபம் தியேட்டரா.அகஸ்தியா தியேட்டரா ? ஆண்களும் பெண்களும் படம் பார்க்க ஆர்வம் கொண்டார்கள் . படம் பற்பல நாட்கள் ஓடியதாக ஞாபகம் .
பாடல்கள் சங்கரா நாதசரீராபரா.. தொரகுனா இதுவன்டி சேவா... ஓம்கார நாதானு... ராகம் தாளம் பல்லவி போன்ற பாடல்கள் ஈ மொய்க்காமல் காதில் தேனாக பாய்கிறது . பாடலுக்காக படமா படத்திற்கு பாடலா என்று பட்டி மன்றமே வைக்கலாம் .
தொரகுனா ..இதுவன்டி சினிமா !

-ஆறுமுகம்