Bill Gates Urges Higher Taxes for Billionaires: பில்லியனர்கள் அதிக வரி செலுத்த வேண்டும் என பில் கேட்ஸ் வலியுறுத்தியுள்ளார்.

செயற்கை நுண்ணறிவு (AI) தொழில்நுட்பத்தின் வேகமான வளர்ச்சி உலக பொருளாதாரத்தில் பெரிய மாற்றங்களை ஏற்படுத்தி வரும் நிலையில், சமூகத்தில் நிலவும் வருமான மற்றும் செல்வ சமத்துவமின்மையை குறைக்க பணக்காரர்கள் மற்றும் கோடீஸ்வரர்கள் அதிக வரி செலுத்த வேண்டும் என்று மைக்ரோசாஃப்ட் நிறுவனத்தின் இணை நிறுவனர் பில் கேட்ஸ் தெரிவித்துள்ளார்.

பிரபல Financial Times Tech Tonic போட்காஸ்டில் பேசிய அவர், சமத்துவமின்மையை சரிசெய்வதில் முக்கிய பொறுப்பு அரசுகளுக்கே இருப்பதாக கூறினார்.

தன்னார்வ அடிப்படையிலான நன்கொடைகள் மட்டும் சமூக பாதுகாப்பு அமைப்புகளுக்குப் பதிலாக இருக்க முடியாது என்றும் அவர் கூறினார். AI தொழில்நுட்பம் பல துறைகளில் மனிதர்களின் பணியை இயந்திரங்கள் மூலம் மாற்றும் சூழலை உருவாக்கி வருகிறது.

இதன் மூலம் உருவாகும் பொருளாதார பலன்கள் பெரும்பாலும் தொழில்நுட்ப நிறுவனங்கள், முதலீட்டாளர்கள் மற்றும் செல்வந்தர்களிடமே குவியும் அபாயம் இருப்பதாக பில் கேட்ஸ் எச்சரித்தார்.

இதனால் தற்போதைய வரி அமைப்புகளை அரசுகள் மறுபரிசீலனை செய்ய வேண்டிய அவசியம் ஏற்பட்டுள்ளதாக அவர் தெரிவித்தார். குறிப்பாக, தொழிலாளர்களைக் காட்டிலும் இயந்திரங்களில் முதலீடு செய்வது நிறுவனங்களுக்கு அதிக நன்மை தரும் வகையில் இருக்கும் தற்போதைய வரி விதிமுறைகள் மாற்றப்பட வேண்டும் என்றார்.

முன்னதாகவே, ரோபோட்டுகளுக்கு வரி விதிக்கும் யோசனையையும் பில் கேட்ஸ் முன்வைத்திருந்தார். தொழில்நுட்ப மாற்றங்களால் வேலை இழக்கும் பணியாளர்களுக்கு உதவவும், சமூக நலத் திட்டங்களை வலுப்படுத்தவும் இந்த வரி வருவாயை பயன்படுத்தலாம் என்று அவர் கருத்து தெரிவித்துள்ளார்.

தனது சொத்துக்களின் பெரும்பகுதியை அடுத்த இருபது ஆண்டுகளில் Gates Foundation மூலம் வழங்க உறுதியளித்துள்ள போதிலும், அரசின் நலத்திட்டங்களுக்கும் பொது சேவைகளுக்கும் நன்கொடைகள் மாற்றாக இருக்க முடியாது என அவர் மீண்டும் வலியுறுத்தியுள்ளார்.