பொலிவியாவில் தனது உரிமையாளர் உயிரிழந்த பின்னரும், அவர் சிகிச்சை பெற்ற மருத்துவமனைக்கு வெளியே 8 ஆண்டுகளாகக் காத்திருக்கும் 'மார்ட்டின்' (Martin) என்ற சேவல் ஊடகங்களில் பெரும் பேசுபொருளாகியுள்ளது.

இந்தச் சேவலின் உரிமையாளர் புற்றுநோய் (cancer) சிகிச்சைக்காகப் பொலிவியாவில் உள்ள கிழக்கு பொலிவிய புற்றுநோய் நிறுவனத்தில் (Oncology Institute of Eastern Bolivia) அனுமதிக்கப்பட்டிருந்தார்.

அவர் அங்கு காலமான பிறகும், அந்தச் சேவல் மருத்துவமனை வளாகத்தை விட்டு நகராமல் அங்கேயே உள்ள மரங்களிலும் வெளியிலும் வசித்து வருகிறது.

இந்தச் சேவலுக்கு அந்தப் பகுதி மக்களும் மருத்துவமனை ஊழியர்களும் உணவளித்துப் பாதுகாத்து வருகின்றனர். குறிப்பாக அது சோளப்பொரியை (popcorn) விரும்பி உண்ணும்.

பல ஆண்டுகள் கடந்தும் தன் எஜமானரின் நினைவாக அதே இடத்தில் அது தொடர்ந்து வாழ்ந்து வருவது பலரையும் நெகிழ்ச்சியடையச் செய்துள்ளதாக சர்வதேச ஊடகங்கள் செய்தி வெளியிட்டுள்ளன.

ஜப்பானில் தன் எஜமானருக்காக நீண்ட காலம் காத்திருந்த விசுவாசமான 'ஹச்சிகோ' நாய்க்கு இணையாக இந்தச் சேவல் வர்ணிக்கப்படுகிறது.