நாட்டின் கல்வி தொடர்பான தீர்மானங்களை எடுக்கும்போது, சிறுவர்களே எமது முதன்மையான நோக்கமாக இருக்க வேண்டும் எனவும், இயற்கை அனர்த்தங்கள் உள்ளிட்ட நாடு எதிர்கொள்ளக்கூடிய எந்தவொரு நெருக்கடி நிலைமையிலும் கல்வியை எவ்விதத் தடையுமின்றித் தொடர்வதற்குத் தேவையான திட்டங்கள் மாவட்ட மற்றும் மாகாண மட்டங்களில் தயாரிக்கப்பட வேண்டும் எனவும் கல்வி, உயர்கல்வி மற்றும் தொழிற்கல்வி அமைச்சர் கலாநிதி ஹரிணி அமரசூரிய தெரிவித்தார்.

இலங்கை பரீட்சைகள் திணைக்களத்தில் நேற்றைய (17) தினம் மாகாணக் கல்வி அதிகாரிகளுடன் நடைபெற்ற பாடசாலை அபிவிருத்தி முன்னேற்ற மீளாய்வுக் கூட்டத்தில் கலந்துகொண்டு உரையாற்றும்போதே பிரதமர் இதனைத் தெரிவித்தார். தீவுகள்ஆராயுங்கள்

புதிய கல்விச் சீர்திருத்தங்களுக்கு அமைவாக முன்னெடுக்கப்படும் அபிவிருத்தித் திட்டங்களின் தற்போதைய முன்னேற்றத்தை மீளாய்வு செய்தல், எதிர்காலத் திட்டங்களைத் தயாரிப்பதற்குத் தேவையான கருத்துக்களைப் பெற்றுக்கொள்ளுதல் மற்றும் முன்மொழிவுகளை ஆராய்தல் ஆகியன இக்கலந்துரையாடலின் முக்கிய நோக்கங்களாக அமைந்தன.

முன்மொழியப்பட்ட கல்விச் சீர்திருத்தங்களுக்கு இணையாகக் கல்வியை டிஜிட்டல் மயமாக்குதல், பாடசாலைகளின் உட்கட்டமைப்பு வசதிகளை மேம்படுத்துதல் மற்றும் மாணவர் நலன்புரித் திட்டங்களின் தற்போதைய முன்னேற்றம் ஆகியவை தொடர்பில் இங்கு விரிவாகக் கலந்துரையாடப்பட்டன. 

அத்துடன், நடத்தப்பட்ட ஆசிரியர் பரீட்சையின் பெறுபேறுகளுக்கு அமைய எதிர்காலத்தில் நேர்முகத் தேர்வுகளை நடத்துதல் மற்றும் ஆட்சேர்ப்பு நடைமுறைகள் தொடர்பிலும் கலந்துகொண்ட மாகாணக் கல்வி அதிகாரிகளுக்கு விளக்கமளிக்கப்பட்டது.

இதன்போது மேலும் கருத்துத் தெரிவித்த பிரதமர், பாடசாலை முறைமையில் நிர்வாக நடவடிக்கைகளையும் கற்பித்தல்–கற்றல் செயற்பாடுகளையும் மேலும் வினைத்திறனுடன் முன்னெடுப்பதற்காகத் தகவல் மற்றும் தொடர்பாடல் தொழில்நுட்பத்தை (ICT) செயற்பாட்டுடன் பயன்படுத்த நடவடிக்கை எடுக்கப்படும் எனக் குறிப்பிட்டார்.

மேலும், டிஜிட்டல் சாதனங்களைப் பயன்படுத்தும்போது சிறுவர்களின் பாதுகாப்பை உறுதிப்படுத்தும் வகையில் பொருத்தமான வயது வரம்புகள் மற்றும் பயன்பாட்டு நேரங்கள் தொடர்பான பாதுகாப்பு வழிகாட்டல்களைத் தயாரிப்பதற்கும், அது குறித்து ஆசிரியர்கள் மற்றும் பெற்றோர்களுக்கு விழிப்புணர்வூட்டும் விசேட வேலைத்திட்டமொன்றை நடைமுறைப்படுத்துவதற்கும் திட்டமிடப்பட்டுள்ளதாகப் பிரதமர் வலியுறுத்தினார்.

எல் நினோ (El Niño) மற்றும் பல்வேறு அனர்த்த நிலைமைகள் காரணமாக எதிர்காலத்தில் ஏற்படக்கூடிய கடும் மழை மற்றும் வறட்சி நிலைமைகள் கல்விச் செயற்பாடுகளில் ஏற்படுத்தக்கூடிய தாக்கங்கள் குறித்தும் இங்கு விசேட கவனம் செலுத்தப்பட்டது. இத்தகைய அனர்த்த நிலைமைகளின்போது சிறுவர்களின் போஷாக்கு மற்றும் சுகாதாரப் பாதுகாப்பில் ஏற்படக்கூடிய பாதிப்புகளைக் குறைப்பதற்கான நடவடிக்கைகளை மேற்கொள்ள வேண்டும் என்றும் பிரதமர் தெரிவித்தார்.

குறிப்பாக, அதிக வெப்பநிலை நிலவும் காலங்களில் விளையாட்டு விழாக்கள் போன்ற நிகழ்வுகளை ஏற்பாடு செய்யும்போது சிறுவர்கள் அசௌகரியங்களுக்கு உள்ளாகாமலும் தேவையற்ற உடல் சோர்வுக்கு ஆளாகாமலும் இருப்பதை உறுதிப்படுத்துமாறும், தேவையற்ற செலவுகளைக் கட்டுப்படுத்துமாறும் அவர் அறிவுறுத்தினார்.

தொடர்ந்தும் முன்னெடுக்கப்பட்டு வரும் பழைய அபிவிருத்தித் திட்டங்களை விரைவாக நிறைவு செய்து, புதிய திட்டங்களை ஆரம்பிப்பதற்கான வாய்ப்புகளை ஏற்படுத்திக்கொள்ள வேண்டும் என்றும் பிரதமர் சுட்டிக்காட்டினார். மேலும், கல்வித்துறையில் தீர்மானங்களை எடுக்கும்போது பிரதேச அல்லது மாவட்ட வேறுபாடுகளுக்கு இடமளிக்காமல், எப்போதும் சிறுவர்களின் நலன்புரிக்கும் தொடர்ச்சியான கல்விக்கும் முன்னுரிமை வழங்கப்பட வேண்டும் என்றும் அவர் வலியுறுத்தினார்.

இந்நிகழ்வில் கல்வி மற்றும் உயர்கல்வி பிரதி அமைச்சர் வைத்தியர் மதுர செனவிரத்ன, கல்வி, உயர்கல்வி மற்றும் தொழிற்கல்வி அமைச்சின் செயலாளர் நாலக கலுவெவ உள்ளிட்ட அமைச்சின் அதிகாரிகள் பலரும் கலந்துகொண்டனர்.