இலங்கை ஊடாகப் போலி ஆவணங்களைப் பயன்படுத்தி பாகிஸ்தானியப் பொருட்களை இறக்குமதி செய்யும் கடத்தல் சம்பவம் தொடர்பான தகவல்களை இந்தியாவின் வருவாய் புலனாய்வுப் பணிப்பகம் அம்பலப்படுத்தியுள்ளது. 

பாகிஸ்தானில் இருந்து இந்தியாவுக்குப் பொருட்களை இறக்குமதி செய்யத் தடை விதிக்கப்பட்டுள்ள நிலையில், இலங்கை ஊடாகப் போலி வர்த்தக ஆவணங்களைப் பயன்படுத்தி, பாகிஸ்தானுக்குச் சொந்தமான 73 லட்சம் கிலோ கிராமிற்கும் அதிகமான கனிமப் பொருட்கள் மற்றும் உப்பு இவ்வாறு இறக்குமதி செய்யப்பட்டுள்ளதாகத் தெரிவிக்கப்படுகிறது.

கடந்த செப்டம்பர் 26 ஆம் திகதிக்கும் ஒக்டோபர் 11 ஆம் திகதிக்கும் இடைப்பட்ட காலத்தில் மேற்கொள்ளப்பட்ட விசேட நடவடிக்கையின் போதே இந்தப் பொருட்கள் கண்டுபிடிக்கப்பட்டுள்ளதுடன், 9 இறக்குமதியாளர்களால் கடந்த மார்ச் மாதம் முதல் 295 கொள்கலன்களில் இந்தப் பொருட்கள் இந்தியாவுக்கு இறக்குமதி செய்யப்பட்டுள்ளதாகக் குறிப்பிடப்பட்டுள்ளதுடன் இறக்குமதி செய்யப்பட்டுள்ள குறித்த பொருட்களின் பெறுமதி 30 கோடி இந்திய ரூபாய்க்கும் அதிகம் எனப் பதிவாகியுள்ளது.

மேலும் ஐக்கிய அரபு இராஜ்ஜியத்தை தளமாகக் கொண்ட நிறுவனமொன்றினால் கொழும்புத் துறைமுகம் ஊடாகப் பொருட்கள் இந்தியாவுக்கு ஏற்றுமதி செய்யப்பட்டுள்ளதாகத் தகவல்கள் வெளியாகியுள்ளன.