சிறைச்சாலையில் கலகொடஅத்தே ஞானசார தேரரின் காவியுடை பலவந்தமாக அகற்றப்பட்டதாக, பிவிதுரு ஹெல உறுமய கட்சியின் தலைவர் உதய கம்மன்பில தெரிவித்துள்ளார்.

கொழும்பில் இன்று (12.10.2026) நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அவர் இதனைக் குறிப்பிட்டுள்ளார்.

கடந்த ஒக்டோபர் 08ஆம் திகதி ஞானசார தேரரைச் சந்திப்பதற்காக அவரது வேண்டுகோளின் பேரில் வெலிக்கடை சிறைச்சாலைக்குச் சென்றதாகக் குறிப்பிட்ட கம்மன்பில, அப்போது காவியுடை அகற்றப்பட்டு சிறைக் கைதிகளுக்கான சீருடையை அணிவிக்க முயற்சித்த விதம் குறித்து தேரர் தன்னிடம் விளக்கியதாகத் தெரிவித்தார்.

தேரர் கடும் மன உளைச்சலில்

2018ஆம் ஆண்டிலும் இதேபோன்ற முயற்சி மேற்கொள்ளப்பட்டபோது தேரர் எதிர்ப்புத் தெரிவித்ததைத் தொடர்ந்து அதிகாரிகள் அந்த முயற்சியைக் கைவிட்டதாகவும், இம்முறை அவ்வாறு செய்யாமல் பல அதிகாரிகள் இணைந்து பலவந்தமாக சிறைச்சாலைச் சீருடையை அணிவிக்க முயற்சித்ததாகவும் கம்மன்பில தெரிவித்துள்ளார். 

இதன்போது, சிறைச்சாலை அதிகாரி ஒருவர் தனது கையடக்கத் தொலைபேசியின் கமராவைச் செயற்படுத்தி, வேறொரு இடத்தில் இருந்த நபர் ஒருவர் இந்தச் சம்பவத்தைப் பார்வையிடுவதற்கு வாய்ப்பளித்ததாக ஞானசார தேரர் தன்னிடம் தெரிவித்ததாகவும் அவர் குறிப்பிட்டார்.

மேலும், ஆளும் தேசிய மக்கள் சக்தியின் உயர்மட்டத் தலைவர்களின் அழுத்தம் காரணமாகவே, ஞானசார தேரருக்கும் சிறைச்சாலை அதிகாரிகளுக்கும் விருப்பமில்லாத நிலையிலும் அவருக்குச் சிறைச்சாலைச் சீருடை அணிவிக்கப்பட்டதாகத் தாம் பொறுப்புடன் தெரிவிப்பதாக கம்மன்பில குற்றஞ்சாட்டினார்.

காவியுடையை அகற்றிய பின்னர், துறவறத்தின் அடையாளமாக எஞ்சியிருந்த இடைக்கச்சையும் அகற்றப்பட்டபோது தேரர் கடும் மன உளைச்சலுக்கு உள்ளானதாகவும் அவர் தெரிவித்துள்ளார்.

அந்த இடைக்கச்சையைப் பெற்றுக்கொள்வதற்காக அதிகாரிகள் கைகளை நீட்டியபோது, மன உளைச்சலில் இருந்த தேரர் அதனை அவர்களிடம் கொடுக்காமல் மேலே வீசியதாகவும், அது அங்கு சுழன்றுகொண்டிருந்த மின்விசிறியில் சிக்கிக்கொண்டதாகவும் கம்மன்பில மேலும் தெரிவித்தார்.