செயற்கை நுண்ணறிவு (AI) அல்லது எடிட்டிங் கருவிகளைப் பயன்படுத்தி போலியான கட்டண ரசீதுகளை உருவாக்கி, உண்மையான பணம் செலுத்தாமலேயே பொருட்கள் அல்லது சேவைகளைப் பெறும் மோசடிகள் குறித்து, விற்பனையாளர்கள் மற்றும் சேவை வழங்குநர்களுக்கு இலங்கை பொலிஸார் எச்சரிக்கை விடுத்துள்ளனர்.

மோசடி செய்பவர்கள் பொருட்களை வாங்கவோ அல்லது சேவைகளைப் பெறவோ ஒப்புக்கொண்டு, பின்னர் பணம் செலுத்தப்பட்டுவிட்டதாகக் கூறி வாட்ஸ்அப் (WhatsApp) அல்லது மெசஞ்சர் (Messenger) வழியாகப் போலியான ரசீதுகளை அனுப்புகிறார்கள்.

மோடியான ரசீதுகளில் கணக்கு எண், பரிவர்த்தனை நேரம், பெயர் மற்றும் செலுத்தப்பட்ட தொகை உள்ளிட்ட, பார்ப்பதற்குத் துல்லியமாகத் தோன்றும் விவரங்கள் இடம்பெற்றிருக்கலாம்.

பின்னர், தங்கள் கணக்கில் பணம் உண்மையில் வரவு வைக்கப்பட்டுள்ளதா என்பதைச் சரிபார்ப்பதற்கு முன்பே, சரக்குகளை ஒப்படைக்குமாறு அல்லது சேவைகளை வழங்குமாறு விற்பனையாளர்கள் அல்லது சேவை வழங்குநர்களை அந்த மோசடிக்காரர்கள் வற்புறுத்துகிறார்கள்.

பொருட்களை வழங்குவதற்கு அல்லது சேவைகளை அளிப்பதற்கு முன்னதாக, தங்கள் கணக்குகளுக்குப் பணம் வந்து சேர்ந்ததை உறுதிப்படுத்திக்கொள்ளுமாறும், விழிப்புடன் இருக்குமாறும் பொதுமக்களை பொலிஸார் வலியுறுத்தியுள்ளனர்.