சிங்கப்பூரில் பிறப்பு விகிதம் முன்னெப்போதும் இல்லாத அளவுக்குக் கடுமையாகக் சரிந்து வருகிறது. இந்தச் சவாலான நிலையை எதிர்கொள்ளும் முயற்சியாக, நாட்டின் இளம் அரசு ஊழியர்களுக்குப் பொருத்தமான வாழ்க்கைத்துணையைத் தேடிக் கொடுப்பதற்காக FirstDate என்ற புதிய செயலியை அந்நாட்டு அரசு சோதனையோட்டமாக அறிமுகப்படுத்தியுள்ளது.

கடந்த 2025-ஆம் ஆண்டின் கணக்கெடுப்பின்படி, சிங்கப்பூரில் ஒரு பெண்ணிற்கான சராசரி பிறப்பு விகிதம் 0.87 ஆகக் குறைந்துள்ளது. அதேவேளையில், இளைஞர்கள் திருமணம் செய்துகொள்ளும் சராசரி வயதும் கணிசமாக அதிகரித்துள்ளது.

இந்த மக்கள் தொகையியல் மாற்றத்தைக் கருத்தில் கொண்டு, இளைஞர்கள் தங்களுக்கு ஏற்ற துணையைத் தேர்ந்தெடுப்பதற்குத் தொழில்நுட்ப வழியில் அரசாங்கமே முன்னின்று உதவி செய்ய முடிவு செய்துள்ளது.

சாதாரண டேட்டிங் செயலிகள் போல முடிவில்லாமல் சுயவிவரங்களைச் (Profiles) சுழற்றிக் கொண்டே இருக்கும் முறை இதில் இல்லை. பயனர்கள் தங்களின் விருப்பங்கள், வாழ்க்கை முறை மற்றும் தார்மீக மதிப்புகள் பற்றிய கேள்விகளுக்குப் பதிலளிக்க வேண்டும்.

அதன் அடிப்படையில், மாதத்திற்கு ஒருமுறை மட்டுமே பொருத்தமான ஒருவரின் சுயவிவரம் பரிந்துரைக்கப்படும். மேலும், கணிதக் கோட்பாடுகளின் அடிப்படையிலான அல்காரிதம் (Algorithm) மூலம் இருவருக்கு இடையிலான பொருத்தத்தின் அளவு கணக்கிட்டுக் காட்டப்படுகிறது.

இரண்டு நபர்களுக்குப் பொருத்தம் உறுதியானதும், இருவரின் ஒப்புதலுக்குப் பிறகே தொடர்புகொள்ளும் விவரங்கள் பகிரப்படும்.

இதில் பயனர்களின் விவரங்கள் மிகவும் பாதுகாப்பாகப் பராமரிக்கப்படுவதோடு, ஒரே அலுவலகப் பிரிவில் பணிபுரிபவர்கள் இணைக்கப்பட மாட்டார்கள்.

1984-ஆம் ஆண்டிலேயே அரசாங்க அமைப்புகள் மூலம் திருமண வழிகாட்டுதல்களை வழங்கிய பாரம்பரியம் கொண்ட சிங்கப்பூர், தற்போது நவீனத் தொழில்நுட்பத்தின் மூலம் இந்த முயற்சியைக் கையில் எடுத்துள்ளது