பொது பல சேனா அமைப்பின் பொதுச் செயலாளர் கலகொட அத்தே ஞானசார தேரருக்கு கொழும்பு நீதிவான் நீதிமன்றம் விதித்த ஒன்பது மாத சிறைத்தண்டனையை கொழும்பு மேல் நீதிமன்றம் உறுதிப்படுத்தியுள்ளது.

முஸ்லிம்களுக்கும் சிங்களவர்களுக்கும் இடையே பிளவை அல்லது முரண்பாட்டைத் தூண்டும் வகையில் ஊடகச் சந்திப்பொன்றில் ஞானசார தேரர் வெளியிட்ட கருத்துகள் தொடர்பான வழக்கு இதுவாகும்.

நீதிவான் நீதிமன்றத்தின் தீர்ப்பை இரத்து செய்யக் கோரி ஞானசார தேரர் தாக்கல் செய்திருந்த மேன்முறையீட்டை மேல் நீதிமன்றம் தள்ளுபடி செய்தது.

இதற்கான தீர்ப்பு இன்று கொழும்பு மேலதிக நீதிவான் முன்னிலையில் வாசிக்கப்பட்டது.

குற்றச்சாட்டில் குற்றவாளி எனத் தீர்ப்பளிக்கப்பட்டதைத் தொடர்ந்து, ஞானசார தேரருக்கு 2025 ஜனவரி 9 அன்று நீதிவான் நீதிமன்றம் ஒன்பது மாத சாதாரண சிறைத்தண்டனையும் 1,500 ரூபாய் அபராதமும் விதித்தது.

தற்போது வேறொரு சிறைத்தண்டனையை அனுபவித்து வரும் ஞானசார தேரர், புதன்கிழமை நடைபெற்ற நீதிமன்ற நடவடிக்கைகளுக்காகச் சிறைச்சாலை அதிகாரிகளால் நீதிமன்றத்தில் முன்னிலைப்படுத்தப்பட்டார்.

இந்தத் தீர்ப்பை எதிர்த்து மேல் நீதிமன்றத்தில் மனுவொன்று தாக்கல் செய்யப்பட்டுள்ளதாகவும், அந்த விவகாரம் 2027 பெப்ரவரி 23 அன்று பரிசீலனைக்கு எடுத்துக்கொள்ளப்படவுள்ளதாகவும் அவரது சட்டத்தரணி நீதிமன்றத்திற்குத் தெரிவித்தார்.

இதனைத் தொடர்ந்து, நீதிவான் நீதிமன்றத்திலான வழக்கு விசாரணை 2027 பெப்ரவரி 25 திகதிக்கு ஒத்திவைக்கப்பட்டதுடன், அன்றைய தினம் ஞானசார தேரரை நீதிமன்றத்தில் ஆஜர்படுத்துமாறு சிறைச்சாலை அதிகாரிகளுக்கு உத்தரவிடப்பட்டது.