முதல் முதலாக ஒரு ஈழத்து திரைப்படத்திற்கு லண்டனில் அரங்கம் நிறைந்த மக்கள் வந்திருப்பது மனதிற்கு மகிழ்ச்சியைத் தருவதாக போராட்டம் திரைப்படத்தின் தயாரிப்பாளர் பாஸ்கரன் கந்தையா தெரிவித்துள்ளார்.

போராட்டம் திரைப்படத்தின் சிறப்புக்காட்சி லண்டனில் திரையிடப்பட்டதன் பின்னர் பார்வையாளர்கள் முன் அவர் இவ்வாறு குறிப்பிட்டுள்ளார்.

அங்கு அவர் மேலும் தெரிவிக்கையில், கடந்த 5 நாட்களாக உலகின் பல்வேறு நாடுகளிலும் இந்த திரைப்படத்தை திரையிட்டு வரும் நிலையில் மக்கள் தரும் ஆதரவு திரைப்படக் குழுவினருக்கு மிகுந்த உற்சாகத்தை அளிக்கின்றது.

ஈழத்து சினிமா வளர வேண்டும் என பல படைப்பாளிகள் பதிவு செய்துள்ள நிலையில் ஐபிசி தமிழின் நான்காவது தயாரிப்பாக இந்த போராட்டம் திரைப்படம் அமைந்துள்ளது.

இந்த திரைப்படம் ஆரம்பிக்கும் போது பல்வேறு போராட்டங்களை எதிர்கொள்ள வேண்டியிருந்ததால் இத்திரைப்படத்திற்கு போராட்டம் என்று பெயர் வைத்தோம்.

அதிகூடிய நாடுகளில் திரையிடப்படும் ஈழத்து திரைப்படமான போராட்டம் 14 நாடுகளில் திரையிடப்படுகின்றது. ஈழத்து சினிமாவில் அதிகூடிய திரையரங்குகளில் திரையிடப்படும் படமாகவும் அதிகூடிய வரவேற்பைப் பெற்ற படமாகவும் இது திகழ்கின்றது. ஈழத்து சினிமா அடுத்த கட்டத்தை நோக்கி நகர்ந்திருக்கின்றது இந்த திரைப்படம் எடுத்துக்காட்டுகின்றது.”என தெரிவித்துள்ளார்.