அமெரிக்காவுடனான வர்த்தகப் போர் தீவிரமடைந்து வரும் நிலையில், இறக்குமதி வரிகளால் கனடாவின் பல்வேறு நகரங்களில் உள்ள தொழிலாளர்கள் மற்றும் வணிகங்களுக்கு ஏற்படும் பாதிப்புகள் குறித்து டொராண்டோ பல்கலைக்கழக ஆராய்ச்சியாளர்கள் விரிவான ஆய்வு அறிக்கை ஒன்றை வெளியிட்டுள்ளனர்.

சுமார் ஒரு ஆண்டிற்கும் மேலாகத் தொடரும் பல்வேறு கட்ட வரி விதிப்புகளால், டொராண்டோ நகரில் மட்டும் சுமார் 66,000 ஊழியர்களும் 3,000-க்கும் மேற்பட்ட வணிக நிறுவனங்களும் நேரடியாகப் பாதிக்கப்பட்டுள்ளதாக அந்த ஆய்வு தெரிவிக்கிறது.

அமெரிக்க ஜனாதிபதி டொனால்ட் டிரம்ப், மார்ச் 2025-இல் முதன்முறையாக ஆட்டோமொபைல் மற்றும் உருக்கு துறைகள் மீது வரிகளை விதித்ததைத் தொடர்ந்து, டொராண்டோ பல்கலைக்கழகத்தின் 'ஸ்கூல் ஆஃப் சிட்டிஸ்' ஆராய்ச்சியாளர்கள் இந்த 'மேப்பிங் டேரிஃப்ஸ்' வரைபடத் திட்டத்தைத் தொடங்கினர்.

கனடா மற்றும் அமெரிக்க அரசு முகமைகளின் தரவுகளைப் பயன்படுத்தி, ஒவ்வொரு மாகாணம், பிராந்தியம் மற்றும் நகராட்சியிலும் அமெரிக்க வரிகளால் ஏற்படும் பாதிப்புத் தன்மையை இந்த வரைபடம் துல்லியமாகக் கணித்துள்ளது.

செப்டம்பர் 1 வரையிலான புதிய வரி மாற்றங்களை உள்ளடக்கி இத்தரவுகள் தொடர்ந்து புதுப்பிக்கப்பட்டு வருகின்றன. ஆகஸ்ட் பிற்பகுதியில் விதிக்கப்பட்ட புதிய வரிகளால் டொராண்டோவில் உள்ள 3,027 வணிக நிறுவனங்கள் (3.2%) மற்றும் சுமார் 66,000 ஊழியர்கள் (4%) நேரடியாகப் பாதிக்கப்படும் நிலையில் உள்ளனர்.

மதுபானங்கள் மற்றும் பால் பொருட்களை இலக்காகக் கொண்ட 'பிரிவு 338' (Section 338) வரிகள் போன்ற புதிய திருத்தங்களை உடனுக்குடன் வரைபடத்தில் இணைத்து வருவதாக ஆய்வாளர்கள் தெரிவித்துள்ளனர்.

உள்ளூர் அளவிலான கொள்கை வகுப்பாளர்கள் மற்றும் அரசு அதிகாரிகளுக்கு இந்த வரைபடம் ஒரு முக்கியமான வழிகாட்டியாக இருக்கும் என்றும், பாதிக்கப்பட்ட உள்ளூர் வணிகங்கள் அமெரிக்காவைத் தவிர்த்து பிற சர்வதேசச் சந்தைகளுக்கு ஏற்றுமதி செய்ய ஊக்குவிப்பதற்கு இத்தரவுகள் பெரிதும் உதவும் என்றும் பேராசிரியர் வினோத்ராய் சுட்டிக்காட்டியுள்ளார்.