அடுத்த 10 நாட்களில் இலங்கை முழுவதும் பரவலான மழை பெய்யக்கூடும் என்று வளிமண்டலவியல் திணைக்களம் தெரிவித்துள்ளது.

மேலும், கனமழை, நிலச்சரிவுகள் மற்றும் வெள்ளப்பெருக்கு ஏற்படக்கூடிய சாத்தியக்கூறுகள் குறித்தும் அது எச்சரித்துள்ளது.

நாடு அதிக மழைப்பொழிவு நிலவும் காலக்கட்டத்திற்குள் நுழைந்துள்ள நிலையில், மோசமடையக்கூடிய வானிலைச் சூழலை எதிர்கொள்ள அதிகாரிகள் தயாராக இருக்க வேண்டும் என்று வளிமண்டலவியல் திணைக்களத்தின் பணிப்பாளர் நாயகம் அஜித் விஜேமன்ன இன்று (16) நடைபெற்ற விசேட ஊடகவியலாளர் சந்திப்பில் தெரிவித்தார்.

தற்போது நிலவும் ‘எல் நினோ’ (El Niño) சூழலின் தாக்கங்களைச் சமாளிக்க ஏற்கனவே ஏற்பாடுகள் செய்யப்பட்டு வருவதாக அவர் கூறினார்.

இருப்பினும், கனமழை மற்றும் அதனால் ஏற்படக்கூடிய ஆபத்துகள் குறித்த முன்னறிவிப்புகளைக் கருத்தில் கொண்டு கூடுதல் நடவடிக்கைகள் எடுக்கப்பட வேண்டும்.

ஒக்டோபர், நவம்பர் மாதங்களில் பலத்த மழை பெய்யக்கூடும் என்றும், இக்காலகட்டத்தில் வெள்ளம் மற்றும் நிலச்சரிவுகள் ஏற்பட வாய்ப்புள்ளதாகவும் விஜேமன்ன தெரிவித்தார்.

ஒக்டோபர் மற்றும் நவம்பர் மாதங்களில் வங்காள விரிகுடாவைச் சுற்றி அடிக்கடி வளிமண்டலக் கொந்தளிப்புகள் உருவாகின்றன என்றும், ‘எல் நினோ’ (El Niño) தாக்கத்தின் காரணமாக இச்சூழ்நிலைகள் தீவிரமடையக்கூடும் என்றும் அவர் விளக்கினார்.

டிசம்பர் மாதத்தில் நாட்டின் வடகிழக்குப் பகுதிகளில் கூடுதல் மழைப்பொழிவு எதிர்பார்க்கப்படுவதால், பொதுமக்களும் சம்பந்தப்பட்ட அதிகாரிகளும் விழிப்புடன் இருக்குமாறு விஜேமன்ன கேட்டுக்கொண்டார்.

இதற்கிடையில், வடக்கு மற்றும் கிழக்கு மாகாணங்களில் சராசரி அளவிலான மழைப்பொழிவு இருக்கும் என்று கணிக்கப்பட்டுள்ளது. 

இருப்பினும், இந்தியப் பெருங்கடல் இருமுனை (IOD) தொடர்பான சில சூழல்கள் அப்பகுதிகளில் வெள்ளப்பெருக்குக்கு வழிவகுக்கக்கூடும் என்றும் அவர் குறிப்பிட்டார்.

அடுத்த ஆண்டு பெப்ரவரி, மார்ச் மற்றும் ஏப்ரல் மாதங்களில் அதிக வெப்பநிலையும், ஒப்பீட்டளவில் குறைவான மழைப்பொழிவும் எதிர்பார்க்கப்படுவதாக விஜேமன்ன தெரிவித்தார்.

மாறிவரும் வானிலைச் சூழலுக்குத் தயாராகும் வகையில், வரும் மாதங்களில் நாடு முழுவதும் கிடைக்கும் மழைநீரைச் சரியாக நிர்வகிப்பதன் முக்கியத்துவத்தை அவர் வலியுறுத்தினார்.