வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத், இலங்கைக்கும் ஐக்கிய அரபு அமீரகத்திற்கும் (UAE) இடையிலான இருதரப்பு ஒத்துழைப்பை மேலும் வலுப்படுத்தும் நோக்கில் இன்று (02) முதல் செப்டம்பர் 3 ஆம் திகதி வரை உத்தியோகபூர்வ விஜயமொன்றை மேற்கொள்கிறார். 

இந்த விஜயத்தின் போது, இரு நாடுகளுக்கும் இடையிலான பரஸ்பர நலன் சார்ந்த விடயங்கள் குறித்து கலந்துரையாடுவதற்கும், ஒத்துழைப்பை விரிவுபடுத்தும் வாய்ப்புகளை ஆராய்வதற்கும், ஐக்கிய அரபு அமீரகத்தின் முக்கிய அமைச்சர்களை அமைச்சர் விஜித ஹேரத் சந்திக்கவுள்ளார்.

அவர் சந்திக்கவுள்ள அமைச்சர்களில், ஐக்கிய அரபு அமீரக மனிதவள மற்றும் அமீரகமயமாக்கல் அமைச்சர் டாக்டர் அப்துல்ரஹ்மான் அப்துல்மன்னான் அல் அவார் மற்றும் பொருளாதார மற்றும் சுற்றுலாத்துறை அமைச்சர் அப்துல்லா பின் தௌக் அல் மர்ரி ஆகியோர் அடங்குகின்றனர்.

வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சின் தகவலின்படி, அமைச்சர் விஜித ஹேரத் நாளை (03) துபாயில் நடைபெறவுள்ள “Sri Lanka Beyond Your Dreams” நிகழ்வின் இரண்டாவது பதிப்பிலும் பங்கேற்கவுள்ளார்.

அந்நிகழ்வில், ஐக்கிய அரபு அமீரக வெளிநாட்டு வர்த்தக அமைச்சர் கலாநிதி தானி பின் அஹ்மத் அல் செயூதி அவர்களுடன் இணைந்து அமைச்சர் விஜித ஹேரத் சிறப்பு விருந்தினராகக் கலந்துகொள்ளவுள்ளார்.