2024 ஆம் ஆண்டின் முதல் காலாண்டிற்கும் 2026 ஆம் ஆண்டின் முதல் மூன்று மாதங்களுக்கும் இடையிலான காலத்தில் கனடாவிற்கும் அமெரிக்காவிற்கும் இடையிலான வர்த்தக மதிப்பு சுமார் 2 பில்லியன் டொலர்களால் குறைவடைந்துள்ளது.

2024 ஆம் ஆண்டின் அதே காலப்பகுதியுடன் ஒப்பிடுகையில் 2026 ஆம் ஆண்டின் முதல் காலாண்டில் அமெரிக்காவுடனான மொத்த பொருட்கள் மற்றும் சேவைகளின் வர்த்தகம் 0.6 சதவீதம் குறைந்துள்ளதாக கனடா உலக விவகார அமைப்பின் பேச்சாளர் ரேச்சல் டோலன் குறிப்பிட்டுள்ளார்.

2026 ஆம் ஆண்டின் முதல் மூன்று மாதங்களில் கனடா - அமெரிக்காவிற்கு இடையிலான மொத்த பொருட்கள் மற்றும் சேவைகள் வர்த்தகம் $322.8 பில்லியனை எட்டியுள்ளது. இதில் ஏற்றுமதி $169.6 பில்லியன் ஆகவும், இறக்குமதி $153.1 பில்லியன் ஆகவும் பதிவாகியுள்ளது.

அமெரிக்காவுக்கான கனடாவின் ஏற்றுமதி 1.6 சதவீதம் சரிவடைந்த அதேவேளையில், அக்காலாண்டில் இறக்குமதி 0.6 சதவீதம் அதிகரித்துள்ளது. கடந்த இரண்டு ஆண்டுகளில் இருதரப்பு வர்த்தகத்தில் விலைமதிப்பற்ற கற்கள் மற்றும் உலோகங்களின் வர்த்தகம் $2.8 பில்லியன் உயர்ந்து மிகப்பெரிய சதவீத அதிகரிப்பைப் பதிவு செய்துள்ளது.

மேலும், கொக்கோ மற்றும் அது சார்ந்த பொருட்களின் வர்த்தகம் 52 சதவீதமும், விமானங்கள் மற்றும் அதன் பாகங்களின் வர்த்தகம் 15.5 சதவீதமும் அதிகரித்துள்ளன.

ஏற்றுமதியைப் பொறுத்தவரை, கொக்கோ மற்றும் அது சார்ந்த பொருட்கள் (58.8%), மின்னணு சாதனங்கள் (9.2%), மற்றும் உப்பு, கந்தகம், மண், கல், சிமென்ட் (57.9%) ஆகியவை அதிக வளர்ச்சியைக் கண்டுள்ளன.

அதேநேரம் இருதரப்பு வர்த்தகத்தில் மிகப்பெரிய சரிவு மோட்டார் வாகனங்கள் மற்றும் அதன் பாகங்கள் துறையில் ஏற்பட்டுள்ளது. இது 18.9 சதவீதம், அதாவது $6.7 பில்லியனால் வீழ்ச்சியடைந்துள்ளது.

இரும்பு மற்றும் எஃகு வர்த்தகம் 43.5 சதவீதமும், கனிம எரிபொருட்கள் மற்றும் எண்ணெய் வர்த்தகம் 3.3 சதவீதமும் சரிவடைந்துள்ளன.

கனடா - அமெரிக்கா - மெக்சிகோ வர்த்தக ஒப்பந்தம் (CUSMA) தொடர்பான முறையான பேச்சுவார்த்தைகளுக்கு முன்னதாக அமெரிக்கா கனடா மீதான அழுத்தத்தை அதிகரித்து வரும் நிலையிலும், அமெரிக்க அதிபர் டொனால்ட் டிரம்ப் கனடிய பொருட்கள் மீது புதிய வரிகளை விதிக்கப் போவதாக அச்சுறுத்தியுள்ள சூழலிலும் இந்த வர்த்தகச் சரிவு ஏற்பட்டுள்ளது.

குறிப்பாக, அமெரிக்காவுக்கான கனடாவின் பொருட்கள் மற்றும் சேவைகளின் ஏற்றுமதி 2024 இல் $709.6 பில்லியனாகவும், 2025 இல் $683.3 பில்லியனாகவும் பதிவாகியிருந்தது. அதேபோல, இறக்குமதி 2024 இல் $618.3 பில்லியனாகவும், 2025 இல் $604.1 பில்லியனாகவும் இருந்தமை குறிப்பிடத்தக்கது.