நாட்டில் மோட்டார் சைக்கிள் தொடர்பான வீதி விபத்துகளின் எண்ணிக்கையைக் குறைக்கும் நோக்கில், இலங்கை முழுவதும் உள்ள முக்கிய வீதிகளில் மோட்டார் சைக்கிள்களுக்கென பிரத்யேகப் பாதைகளை அறிமுகப்படுத்த அரசாங்கம் திட்டமிட்டுள்ளதாக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க அறிவித்தார்.

இத்திட்டத்தின் முன்னோடி முயற்சி களுவாஞ்சிக்குடியில் தொடங்கப்படவுள்ளதாக அமைச்சர் தெரிவித்தார்.

இலங்கையில் ஆண்டுதோறும் பதிவாகும் வீதி விபத்துகளில் பெரும்பாலானவை மோட்டார் சைக்கிள் விபத்துகளே என்று சுட்டிக்காட்டிய அவர், வீதிப் பாதுகாப்பை மேம்படுத்துவதற்கான முக்கிய நடவடிக்கையாக இதற்கெனத் தனிப் பாதைகளை அறிமுகப்படுத்துவது அமையும் என்றும் குறிப்பிட்டார்.

இலங்கையில் ஆண்டுதோறும் சுமார் 2,500 பேர் வீதி விபத்துகளில் உயிரிழக்கின்றனர்.

2025 ஆம் ஆண்டில் இந்த எண்ணிக்கை சுமார் 2,750-ஐ எட்டியது.

மேலும், 2019-ஆம் ஆண்டில் மட்டும் சுமார் 1,400 மோட்டார் சைக்கிள் சாரதிகளும், பின்னால் அமர்ந்து பயணித்தவர்களும் உயிரிழந்துள்ளனர்.

கடந்த காலங்களில் மோட்டார் சைக்கிள் தொடர்பான விபத்துகளில் சுமார் 9,000 பேர் உயிரிழந்துள்ளனர்.

நாட்டில் வீதி விபத்துகளால் ஏற்படும் உயிரிழப்புகளைக் குறைக்க, மோட்டார் சைக்கிள் பாதுகாப்பை உறுதி செய்வது மிக அவசியம்.

இந்த முன்னோடித் திட்டத்தின் ஒரு பகுதியாக, களுவாஞ்சிகுடியில் உள்ள பிரதான சாலையின் ஒரு பகுதி மோட்டார் சைக்கிள்களுக்கென பிரத்யேகமாக ஒதுக்கப்படவுள்ளது. 

அப்பகுதியில் மோட்டார் சைக்கிள்களின் எண்ணிக்கை அதிகமாக இருப்பதை கருத்தில் கொண்டு, வழக்கமான பாதை அடையாளங்களுக்குப் பதிலாக, வீதித் தடுப்புகளைப் (road breakers) பயன்படுத்தி இந்தப் பிரத்யேகப் பாதை மற்ற வாகனப் பாதைகளிலிருந்து நேரடியாகப் பிரித்து அமைக்கப்படும் என்றும் அமைச்சர் தெரிவித்தார்.