இந்த ஆண்டில் இதுவரை சுமார் 1.2 மில்லியன் சுற்றுலா பயணிகள் வருகை

இலங்கை

2026 ஆம் ஆண்டில் இதுவரை இலங்கைக்கு வருகை தந்த சுற்றுலாப் பயணிகளின் எண்ணிக்கை சுமார் 1.2 மில்லியனை எட்டியுள்ளதாக சுற்றுலாத்துறை இராஜாங்க அமைச்சர் ருவன் ரணசிங்க தெரிவித்துள்ளார்.

கொழும்பில் நடைபெற்ற ஊடகவியலாளர் சந்திப்பில் கலந்துகொண்டு உரையாற்றும்போதே அவர் இக்கருத்துக்களை வெளியிட்டார்.

இக்காலப்பகுதியில் வருகை தந்த சுற்றுலாப் பயணிகளால் 1.5 பில்லியன் அமெரிக்க டொலருக்கும் அதிகமான அந்நியச் செலாவணி வருமானம் ஈட்டப்பட்டுள்ளதாகவும் அவர் மேலும் குறிப்பிட்டார்.

நாட்டின் சுற்றுலாத்துறையில் தொடர்ந்து காணப்படும் சாதகமான வளர்ச்சியின் மூலம், 2026-ஆம் ஆண்டில் 2.5 மில்லியன் சுற்றுலாப் பயணிகளை ஈர்க்கும் இலக்கை இலங்கை வெற்றிகரமாக அடையும் என்றும் இராஜாங்க அமைச்சர் நம்பிக்கை வெளியிட்டார்.