நீர்கொழும்பு சிறைச்சாலையில் தடுத்து வைக்கப்பட்டிருந்த பெண் கைதிகள் குழுவினர் வேறு சிறைகளுக்கு மாற்றப்பட்டுள்ளனர்.

குறிப்பிட்ட கைதிகள் நேற்று (08) இரவு வாரியபொல மற்றும் போகம்பர சிறைச்சாலைகளுக்கு மாற்றப்பட்டதாக சிறைச்சாலைகள் திணைக்களம் தெரிவித்துள்ளது.

குறிப்பிட்ட சிறையில் தடுத்து வைக்கப்பட்டுள்ள வெளிநாட்டைச் சேர்ந்த பெண் கைதிகள் அடங்கிய குழுவொன்றும் அவர்களிடையே உள்ளதாகத் தெரிவிக்கப்படுகிறது.

நீர்கொழும்பு சிறையில் நிலவிய அமைதியின்மைக்கு மத்தியில், அங்குள்ள பெண் கைதிகள் குழுவொன்றும் போராட்டத்தில் ஈடுபட்டது.

எனினும், போராட்டம் தற்போது முடிவுக்கு வந்துள்ளதாகவும், கைதிகள் படிப்படியாக வேறு சிறைச்சாலைகளுக்கு மாற்றப்பட்டு வருவதாகவும் சிறைச்சாலைகள் ஊடகப் பேச்சாளர் ஏ.சி. கஜநாயக்க குறிப்பிட்டார்.

இதற்கிடையில், நீர்கொழும்பு சிறையிலிருந்து ஆண் கைதிகளை ஏனைய சிறைகளுக்கு மாற்றும் பணிகள் தொடர்ந்து நடைபெற்று வருகின்றன.

அந்தந்தச் சிறைகளில் உள்ள வசதிகளை ஆய்வு செய்த பின்னரே இம்மாற்றங்கள் மேற்கொள்ளப்படுவதாகச் சிறைச்சாலைகள் திணைக்களம் கூறியுள்ளது.

நீர்கொழும்பு சிறையில் இன்னும் சுமார் 1,000 கைதிகள் தடுத்து வைக்கப்பட்டுள்ளதாகவும் தெரிவிக்கப்படுகிறது.

இதேவேளை, அங்குனகொலபெலஸ்ஸ, பூசா மற்றும் வெலிக்கடை சிறைச்சாலைகளில் மூன்று கைதிகள் உயிரிழந்தமை தொடர்பில் பொலிஸார் விசாரணைகளை ஆரம்பித்துள்ளனர்.

சம்பந்தப்பட்ட சிறைச்சாலைகளின் அதிகார வரம்பிற்குட்பட்ட பொலிஸ் நிலையங்களால் இந்த விசாரணைகள் தொடங்கப்பட்டுள்ளதாக பொலிஸ் ஊடகப் பிரிவு தெரிவித்துள்ளது.

நீர்கொழும்பு சிறையிலிருந்து அங்குனகொலபெலஸ்ஸ சிறை மற்றும் பூசா சிறைக்கு அண்மையில் மாற்றப்பட்ட இரு கைதிகள், திடீர் சுகயீனம் காரணமாக வைத்தியசாலையில் அனுமதிக்கப்பட்ட நிலையில் உயிரிழந்தனர்.

அதேநேரம், வெலிகட சிறைச்சாலையில் கைதி ஒருவர் தற்கொலை செய்துகொண்டதாகவும் தகவல் வெளியாகியுள்ளது.

இச்சம்பவங்கள் குறித்து சம்பந்தப்பட்ட பொலிஸ் நிலையங்களுக்குத் தெரிவிக்கப்பட்டுள்ளதாகவும், விசாரணைகள் தொடங்கப்பட்டுள்ளதாகவும் பொலிஸார் தெரிவித்தனர்.