ஐக்கிய அரபு அமீரகத்திற்கான இலங்கையின் தேயிலை ஏற்றுமதி, 2024 ஆம் ஆண்டில் 17.73 மில்லியன் கிலோ கிராமாக இருந்த நிலையில், 2025-ஆம் ஆண்டில் 18.32 மில்லியன் கிலோ கிராமாக அதிகரித்து, 3.3 சதவிகித வளர்ச்சியைப் பதிவு செய்துள்ளது என்று ஒரு சிரேஷ்ட அதிகாரி தெரிவித்துள்ளார்.

இலங்கைத் தேயிலைக்கான வலுவான தேவை மற்றும் அதன் தரம், நம்பகத்தன்மைக்கான நற்பெயர் ஆகியவற்றின் காரணமாக, வரும் ஆண்டுகளில் ஐக்கிய அரபு அமீரகத்திற்கும் வளைகுடா ஒத்துழைப்பு கவுன்சில் (GCC) பிராந்தியத்திற்கும் இலங்கையிலிருந்து தேயிலை ஏற்றுமதி தொடர்ந்து உயரும் என்று ஐக்கிய அரபு அமீரகத்திற்கான இலங்கையின் தூதர் கலாநிதி அருஷா கூரே எதிர்பார்த்துள்ளார்.

2025-ஆம் ஆண்டில் இலங்கையின் தேயிலை ஏற்றுமதிக்கான மிகப்பெரிய இலக்கு ஈராக்காகும் என்றும், இது மொத்த ஏற்றுமதியில் 15.31 சதவீதத்தைக் கொண்டிருக்கும் என்றும் தரவுகள் காட்டின. 

அதனைத் தொடர்ந்து ரஷ்யா 8.39 சதவீதத்துடனும், துருக்கி 8.27 சதவீதத்துடனும் அடுத்தடுத்த இடங்களில் இருந்தன.

சர்வதேச தேநீர் தினத்தை முன்னிட்டு அபுதாபியில் உள்ள இலங்கைத் தூதரகம் அபுதாபி குளோபல் மார்க்கெட்டில் (ADGM) ஏற்பாடு செய்திருந்த நிகழ்வொன்றில் கலந்து கொண்டு கருத்து தெரிவிக்கும் போது அருஷா கூரே இதனைக் குறிப்பிட்டார்.

இந்த நிகழ்வில் மேலும் பேசிய அவர், இலங்கைத் தேயிலையின் பாரம்பரியம், நாட்டின் பொருளாதாரத்திற்கு அதன் பங்களிப்பு மற்றும் பல ஆண்டுகளாக இத்தொழில்துறை பெற்றுள்ள சர்வதேச அங்கீகாரம் ஆகியவற்றை எடுத்துரைத்தார்.

இலங்கையின் ஏழு தேயிலை உற்பத்திப் பிராந்தியங்களில் விளையும் தேயிலையின் தனித்துவமான பண்புகள், தீவில் தேயிலை உற்பத்தியின் பரிணாம வளர்ச்சி மற்றும் உலகச் சந்தைகளுக்கு ஒரு முக்கிய ஏற்றுமதியாளராக நாட்டின் தொடர்ச்சியான பங்கு ஆகியவை குறித்தும் அவர் பேசினார்.

இந்த நிகழ்வில் ஐக்கிய அரபு அமீரகத்தின் மூத்த அதிகாரிகள், தூதர்கள், தேயிலை இறக்குமதியாளர்கள், ஊடகப் பிரதிநிதிகள் மற்றும் தொழில்துறை சார்ந்தவர்கள் உட்பட 75க்கும் மேற்பட்ட பங்கேற்பாளர்கள் கலந்து கொண்டனர்.

இந் நிகழ்வு, இலங்கைக்கும் ஐக்கிய அரபு அமீரகத்திற்கும் இடையிலான வலுவான கலாச்சார மற்றும் பொருளாதார உறவுகளை எடுத்துக்காட்டியதுடன், இரு நாடுகளுக்கும் இடையிலான வளர்ந்து வரும் வர்த்தக உறவையும் வலுப்படுத்தியது.