2019 உயிர்த்த ஞாயிறு பயங்கரவாதத் தாக்குதல்கள் தொடர்பாக முன்னாள் அரச புலனாய்வு சேவைத் தலைவரும், ஓய்வுபெற்ற மேஜர் ஜெனரலுமான சுரேஷ் சல்லே தீவிரமாக சதித்திட்டம் தீட்டியுள்ளார் என்பதை நிரூபிக்க போதுமான ஆதாரங்கள் சேகரிக்கப்பட்டுள்ளன என்று பொதுப் பாதுகாப்பு அமைச்சர் ஆனந்த விஜேபால தெரிவித்துள்ளார்.
நாடாளுமன்றத்தில் இன்று (10) உரையாற்றிய அமைச்சர் விஜேபால, திட்டமிடப்பட்ட பயங்கரவாதத் தாக்குதல்கள் மற்றும் அது தொடர்பான வன்முறைத் தீவிரவாதச் செயல்பாடுகள் குறித்து சல்லேவுக்கு முன்னரே தெரிந்திருந்தது என்றும் கூறினார்.
இது தொடர்பில் அவர் மேலும் கூறியுள்ளதாவது,
தாக்குதல்களுக்கு மூன்று வாரங்களுக்கு முன்பு, நீர்கொழும்பில் உள்ள ஒரு தேவாலயத்தில் திருப்பலியில் கலந்துகொள்பவர்களின் எண்ணிக்கை உள்ளிட்ட முக்கியத் தகவல்களைச் சேகரிப்பதற்காக, சல்லே நான்கு முஸ்லிம் நபர்களைப் பயன்படுத்தியிருந்தார்.
அந்த நால்வரில் முதன்மையான நபர், குற்றப் புலனாய்வுத் துறையின் (CID) சாட்சிகளால் ஒரு ஐ.எஸ்.ஐ.எஸ்.தீவிரவாதி என அடையாளம் காணப்பட்டுள்ளார்.
மேலும், ஈஸ்டர் தாக்குதல்களுக்குப் பின்னர் அவர் காணாமல் போனதாகவே தெரிவிக்கப்பட்டுள்ளது.
தாக்குதல்கள் குறித்து இராணுவப் புலனாய்வு சேவைக்குத் தகவல் அளித்த அந்த உளவாளியை, கொழும்பில் உள்ள ஒரு விடுதியில் சல்லே சந்தித்ததற்கான ஆதாரங்கள் உள்ளன.
தாக்குதல்கள் தொடர்பான அதிர்ச்சியூட்டும் விவரங்களை வெளிப்படுத்தக்கூடிய முக்கியத் தகவல்கள் வெளிப்படுவதைத் தடுக்க சல்லே நடவடிக்கை எடுத்திருந்தார்.
மனிதாபிமானமற்ற முறையில் நடத்தப்பட்டதாகக் கூறும் அண்மைய அறிக்கைகள் பொய்யானவை.
ஒரு முக்கிய சந்தேக நபருக்கு வழங்கப்படும் அனைத்துத் தேவையான ஏற்பாடுகளும், அவரது சட்டத்தரணிகளூடான ஆலோசனைகள் உட்பட சல்லேவுக்கு வழங்கப்பட்டுள்ளன.
சல்லேயின் உடல்நலம் மற்றும் நலனைக் கருத்தில் கொள்ள நீதிபதி அவரைச் சந்தித்தபோது, மனிதாபிமானமற்ற நடத்தை குறித்து நீதிபதியிடம் எந்தப் முறைப்பாடும் தெரிவிக்கப்படவில்லை.
மனிதாபிமானமற்ற நடத்தை தொடர்பாக சல்லே மற்ற அதிகாரிகளிடமும் எந்த முறைப்பாட்டையும் தெரிவிக்கவில்லை.
விசாரணைகளுக்குத் தடையாக இருக்கும் வகையில், சல்லே இதுவரை தனது மடிக்கணினி மற்றும் கைபேசியின் கடவுச்சொற்களை புலனாய்வாளர்களுக்கு வழங்க மறுத்து வருகிறார்.
உயிர்த்த ஞாயிறு தாக்குதல்கள் தொடர்பான விசாரணைகள் எந்தவொரு போராட்டங்களாலோ அல்லது சத்தியாகிரகங்களாலோ நிறுத்தப்படாது – என்றார்.