கனடாவில், திரைப்பட பாணியில் பல பெண்களை திருமணம் செய்து ஏமாற்றிய நபர் ஒருவர், இன்னும் சுதந்திரமாக நடமாடிக்கொண்டிருக்கிறார்.

நான் அவன் இல்லை என்னும் பெயரில் இரண்டு தமிழ்த் திரைப்படங்கள் வெளியாகின.

அவற்றில், ஒரே நபர் வெவ்வேறு வேடமிட்டு ஏமாற்றி பல பெண்களைத் திருமணம் செய்துகொள்வார்.

கனடாவில் அதேபோல் ஒருவர் பல பெண்களை ஏமாற்றியதைக் குறித்த ஒரு செய்தி வெளியாகியுள்ளது.

ஜேசன் வாஷிங்டன் என்னும் அந்த நபர், 2018ஆம் ஆண்டு பிரிட்டிஷ் கொலம்பியாவில் உடற்பயிற்சிக் கூடம் ஒன்றில் ஒரு பெண்ணை சந்தித்துள்ளார். 

அவரது காதலில் உருகிய சாரா என்னும் அந்தப் பெண், ஏற்கனவே திருமணமாகி கணவனைப் பிரிந்து ஒரு மகனுடன் வாழ்ந்துவந்தவர்.

தன்னை முன்னாள் ராணுவ வீரர் என அறிமுகம் செய்துகொண்ட ஜேசனைக் கண்டதும், வாட்டசாட்டமாக இருக்கும் அவர் தன்னையும் தன் மகனையும் பத்திரமாக பாதுகாத்துக்கொள்வார் என நம்பியுள்ளார் சாரா.

ஆனால், திருமணத்துக்குப் பிறகு ஜேசனுடைய உண்மையான முகம் தெரியவந்துள்ளது. சாராவின் மகனை கடுமையாக தண்டிக்கத் துவங்கியுள்ளார் ஜேசன். அத்துடன், ஒருவரைத் தாக்கியதற்காக ஜேசன் ஒரு நாள் சிறைக்கும் செல்ல, பயந்துபோன சாரா, உடனடியாக தன் மகனுடன் வேறொரு வீட்டுக்குக் குடிபெயர்ந்துள்ளார்.

இதற்கிடையில், ’Are we dating the same guy’ என்னும் பெயரில் ஒரு சமூக ஊடகப்பக்கம் எம்மா என்னும் பெண்ணின் கவனத்தை ஈர்த்துள்ளது.

அந்த சமூக ஊடகப்பக்கதில் இருந்த புகைப்படம், ஜேசனுடையது. அதாவது, ஜேசன், சாராவைப்போலவே பல பெண்களை ஏமாற்றி திருமணம் செய்துகொண்டுள்ளார்.

சாராவைப் போலவே எம்மாவும் ஜேசனிடம் ஏமாந்துள்ளார். ஏற்கனவே திருமணமாகி கணவனைப் பிரிந்து ஒரு மகனுடன் வாழ்ந்துவந்த எம்மாவுக்கும் ஜேசனுடைய உண்மையான முகம் தெரியவர, பயந்துபோய் அவரும் ஜேசனைப் பிரிந்து வேறிடத்துக்குச் சென்றுவிட்டார்.

அதற்குப் பிறகு ஊடகங்கள் மேற்கொண்ட ஆய்வில், ஜேசன் நான்கு பெண்களைத் திருமணம் செய்துகொண்டது தெரியவந்துள்ளது.

கடைசியாக அவர் அமெரிக்காவில் ஒரு பெண்ணைத் திருமணம் செய்துகொள்ள, ஜேசனுடைய சுயரூபம் தெரிந்த அந்தப் பெண், 2025 டிசம்பரில் முறைப்படி அவரிடமிருந்து விவாகரத்து செய்துள்ளார். அவர் ஆசிய நாட்டவர் என கருதப்படுகிறது.

விடயம் என்னவென்றால், அவரைத் தவிர மற்ற மூன்று பெண்களும் முறைப்படி ஜேசனிடமிருந்து விவாகரத்து பெறவில்லை. ஜேசனிடம் அவர்களுடைய திருமண சான்றிதழ்கள் உள்ளன.

ஊடகவியலாளர்கள் ஜேசனை தொடர்புகொண்டபோது, தான் யாரையும் ஏமாற்றவில்லை என்றும், தான் திருமணம் செய்த ஒவ்வொரு பெண்ணையும் தான் மனதார நேசித்ததாகவும் கூறுகிறார். 

இப்படி ஒருவருக்குத் தெரியாமல் இன்னொரு பெண்ணை ஏமாற்றி திருமணம் செய்துள்ளீர்களே என்று கேட்டால், ஒரு ஆணை திருமணம் செய்துகொள்ளும் முன் அவனது பின்னணி குறித்து அறிந்துகொள்ளவேண்டியது பெண்ணின் வேலை என்கிறார் ஜேசன்.

உங்களுக்கு ஏற்கனவே திருமணம் ஆனது எப்படி உங்களைத் திருமணம் செய்துகொள்ளப்போகும் பெண்ணுக்குத் தெரியும் என்று கேட்டால், நான் யாரைத் திருமணம் செய்துகொண்டேன் என்பது குறித்து நான் எப்போதுமே 100 சதவிகிதம் வெளிப்படையாக இருந்திருக்கிறேன், அவர்கள் எல்லாம் தங்களுக்குள் பேசிக்கொள்வார்கள், நண்பா, அவர்கள் பெண்கள், என்கிறார்!

விடயம் என்னவென்றால், கனடாவிலும் அமெரிக்காவிலும் ஒன்றுக்கு மேற்பட்ட பெண்களைத் திருமணம் செய்துகொள்வது குற்றம்.

ஆக, ஜேசன் ஏற்கனவே திருமணமானவர் என்னும் நிலையில், எந்த கனேடிய அதிகாரியும் தங்கள் திருமணச் சான்றிதழை செயல்படுத்தியிருக்கக்கூடாது என்ற வாதத்தை முன்வைத்து ஜேசனுடனான தங்கள் திருமணத்தை ரத்து செய்ய முயன்றுவருகிறார்கள் சாராவும் எம்மாவும்!