கனடாவில் மீட்கப்பட்ட மர்மப்பொருள்

கனடா

கனடாவின் மிட்லாந்து பகுதியில் சனிக்கிழமை இரவு பரபரப்பு ஏற்பட்டது. சந்தேகத்திற்கிடமான ஒரு பொருள் கண்டுபிடிக்கப்பட்டதால், அது வெடிகுண்டாக இருக்கலாம் என்ற அச்சத்தில் போலீசார் அவசர நடவடிக்கை எடுத்தனர்.

இரவு சுமார் 11 மணியளவில் டொனால்டா வீதி – ஜான்சன் வீதி அருகே சந்தேகத்திற்கிடமான பொருள் கண்டுபிடிக்கப்பட்டதாக தகவல் கிடைத்தது என பொலிஸார் தெரிவித்துள்ளனர்.

இரு இளைஞர்கள் வெளியில் விளையாடிக் கொண்டிருந்தபோது, பழைய இராணுவ ஆயுதத்தைப் போன்ற ஒரு பொருளை கண்டுபிடித்துள்ளனர்.

அதை அருகிலுள்ள வீட்டுக்குள் கொண்டு சென்ற பின்னரே போலீசாருக்கு தகவல் தெரிவிக்கப்பட்டது.

அதனைத் தொடர்ந்து, சம்பவ இடத்துக்கு சென்ற போலீசார், அந்த வீட்டிலிருந்தவர்களையும் அருகிலுள்ள குடியிருப்பாளர்களையும் பாதுகாப்பாக வெளியேறுமாறு அறிவுறுத்தினர்.

மேலும், அந்த பகுதி முழுவதும் மூடப்பட்டு, விசாரணை மேற்கொள்ளப்பட்டது. சம்பவத்தின் தீவிரத்தை கருத்தில் கொண்டு, OPP வெடிகுண்டு அகற்றும் பிரிவும் (Explosives Disposal Unit) அழைக்கப்பட்டது.

நிபுணர்களின் ஆய்வுக்குப் பிறகு, அந்த பொருள் உண்மையில் வெடிகுண்டு அல்ல; இராணுவ பயிற்சிக்காக பயன்படுத்தப்பட்ட சாதனம் என்று உறுதி செய்யப்பட்டது. பின்னர், அந்த பொருள் பாதுகாப்பாக அகற்றப்பட்டு, போலீஸ் காவலில் எடுக்கப்பட்டது.

அதிகாலை 1 மணியளவில் பகுதி மீண்டும் திறக்கப்பட்டதுடன், எந்தவித காயங்களும் பதிவாகவில்லை. இந்த சம்பவத்தின் போது ஒத்துழைத்த பொதுமக்களுக்கு போலீசார் நன்றி தெரிவித்துள்ளனர்.