அமெரிக்கா மற்றும் கனடாவை இணைக்கும் புதிய “கோர்டி ஹவ் சர்வதேச பாலம்” திறப்பைத் தடுக்கலாம் என அமெரிக்க ஜனாதிபதி டொனால்ட் டிரம்ப் மிரட்டல் விடுத்துள்ளார்.

வாஷிங்டன்–ஒட்டாவா உறவில் ஏற்பட்டுள்ள பொருளாதார பதற்றம் மேலும் தீவிரமடைந்துள்ள சூழலில் இந்த அறிவிப்பு வெளியாகியுள்ளது.

டிட்ராய்ட் (அமெரிக்கா) மற்றும் ஒன்டாரியோ மாகாணத்தின் விண்ட்சர் (கனடா) நகரங்களை இணைக்கும் 1.5 மைல் நீளமுடைய இந்தப் பாலத்தின் முக்கிய கட்டுமானப் பணிகள் நிறைவடைந்துள்ளன.

பரிசோதனை காலத்தைத் தொடர்ந்து இந்த ஆண்டுக்குள் திறக்கப்பட உள்ளது.

ஆனால், “அமெரிக்கா வழங்கிய அனைத்திற்கும் முழுமையான இழப்பீடு கிடைக்கும் வரை, மேலும் கனடா அமெரிக்காவுக்கு உரிய நியாயமும் மரியாதையும் வழங்கும் வரை இந்தப் பாலத்தை திறக்க நான் அனுமதிக்க மாட்டேன். உடனடியாக பேச்சுவார்த்தைகளைத் தொடங்குவோம்,” என டிரம்ப் தனது சமூக ஊடகப் பதிவில் தெரிவித்துள்ளார்.

இந்தப் பாலத் திறப்பைத் தடுக்க டிரம்ப் எந்த அதிகாரத்தின் கீழ் செயல்படுவார் என்பது தெளிவாக இல்லை.

கனடா “அமெரிக்கா மற்றும் கனடா இரு பக்கங்களையும் முழுமையாகக் கட்டுப்படுத்துகிறது; மேலும் அமெரிக்கப் பொருட்கள் பெரும்பாலும் பயன்படுத்தப்படவில்லை” என டிரம்ப் குற்றம்சாட்டியுள்ளார்.

ஆனால், 4 பில்லியன் அமெரிக்க டொலர் மதிப்பிலான இந்தப் பாலம் கனடா அரசால் முழுமையாக நிதியளிக்கப்பட்டு கட்டப்பட்டாலும், 2012 ஒப்பந்தத்தின் படி இது கனடா அரசு மற்றும் மிச்சிகன் மாநிலம் ஆகியவற்றின் கூட்டு உரிமையில் இருக்கும் என குறிப்பிடப்பட்டுள்ளது.

மேலும், கட்டுமானத்தில் பயன்படுத்தப்படும் இரும்பு மற்றும் எஃகு அமெரிக்கா அல்லது கனடாவில் தயாரிக்கப்பட்டவையாக இருக்க வேண்டும்; ஒரு நாடு மற்றொன்றை விட முன்னுரிமை பெறக்கூடாது என்றும் ஒப்பந்தத்தில் கூறப்பட்டுள்ளது.

விண்ட்சர் நகர மேயர் ட்ரூ டில்கென்ஸ், “மிச்சிகன் பகுதி கட்டுமானத்தில் அமெரிக்க எஃகு பயன்படுத்தப்பட்டுள்ளது. இது நம்ப முடியாத குற்றச்சாட்டு,” என தெரிவித்துள்ளார்.