கொத்மலை பகுதியில் கடந்த 27ஆம் திகதி இரவு மற்றும் நேற்று (28) அதிகாலை வேளையில் மண்சரிவு ஏற்பட்டதாக, அந்தப் பகுதியில் உள்ள வீடொன்றைச் சேர்ந்த ஒருவர் அறியப்படுத்தியுள்ளார்.

நுவரெலியா – பூண்டுலோயா வீதிகளுக்கு இடையேயான கிராமத்தின் மத்திய பகுதியே இவ்வாறு மண்சரிவில் சிக்கியுள்ளதாகத் தெரிய வந்துள்ளது.

இதேவேளை, மலையக பகுதிகளில் மின்சாரம் மற்றும் தொலைத்தொடர்புகள் துண்டிக்கப்பட்டுள்ள நிலையில் அங்கு உள்ள மக்களை உதவி குழு தொடர்புகொள்ளமுடியாத நிலை ஏற்பட்டுள்ளது.

இதனால் இந்த மண்சரிவு காரணமாக உயிரிழந்தவர்களின் சடலங்கள் அங்கேயே இருப்பதாகவும், அவற்றை அகற்றவோ அல்லது காயமடைந்தவர்களை வைத்தியசாலையில் அனுமதிக்கவோ முடியாமல் அப்பகுதி மக்கள் பெரும் சிரமத்திற்குள்ளாகியுள்ளதாகவும் தகவல் கிடைத்துள்ளது.

சுமார் 50 பேருக்கும் அதிகமானவர்கள் இந்த மண்சரிவால் அங்குச் சிக்கியுள்ளதாகத் தெரிவிக்கப்படுகிறது.

இதனால், அப்பகுதியில் சிக்கியுள்ள மக்களை மீட்கத் துரித நடவடிக்கைகளை எடுக்குமாறு பாதிக்கப்பட்ட மக்களின் உறவினர்கள் அரசாங்கத்திடம் கோரிக்கை விடுத்துள்ளனர்.

அந்த இடத்தைச் சென்றடைவது முற்றிலும் தடைப்பட்டுள்ளதாகவும், இதுவரை எந்தவொரு அனர்த்த நிவாரணக் குழுவும் குறித்த இடத்தை அடையவில்லை எனவும் தெரிவிக்கப்படுகிறது.

தகவல் தொடர்புத் தடைகள் காரணமாக இந்தத் தகவலைப் பெறுவது கடினமாக இருப்பதாகவும் பொலிஸ் ஊடகப் பேச்சாளர் அலுவலகம் குறிப்பிட்டுள்ளது.