இது தான் என்னுடைய பிளாக்பஸ்டர் பிறந்தநாள் பரிசு - தனுஷின் நெகிழ்ச்சி பதிவு
சினிமா
தனுஷ் தனது 50-வது திரைப்படமான 'ராயன்' படத்தை இயக்கி நடித்துள்ளார். சன் பிக்சர்ஸ் நிறுவனம் தயாரித்துள்ள இந்த படத்தில், எஸ்.ஜே.சூர்யா, செல்வராகவன், பிரகாஷ் ராஜ், சந்தீப் கிஷான், துஷாரா விஜயன், அபர்ணா பாலமுரளி, வரலட்சுமி சரத்குமார் உள்ளிட்ட பலர் நடித்துள்ளனர்.
இந்த படத்துக்கு இசையமைப்பாளர் ஏ.ஆர்.ரகுமான் இசையமைத்துள்ளார்.
ராயன் படம் கடந்த வெள்ளிக்கிழமை திரையரங்குகளில் வெளியானது. இப்படம் வெளியாகி ரசிகர்களிடையே நல்ல வரவேற்பை பெற்று வருகிறது. முதல் நாள் வசூல் மட்டும் 13 கோடி ரூபாயை தாண்டியுள்ளது. நேற்று பிறந்தநாள் கொண்டாடிய தனுஷுக்கு ஏராளமான திரைப்பிரபலங்கள் வாழ்த்து தெரிவித்தனர்.
பல ரசிகர்கள் அவரின் வீட்டை முற்றுகையிட்டு பிறந்தநாள் வாழ்த்தை தெரிவித்தனர். இதற்கெல்லாம் நன்றி சொல்லும் வகையில் தனுஷ் அவரது எக்ஸ் தளத்தில் பதிவு ஒன்றை பதிவிட்டுள்ளார்.
அதில் என் பார்வையாளர்களுக்கும் , சக திரைத்துறை நண்பர்களுக்கும், செய்தியாளர்களுக்கும், பத்திரிக்கைத்துறைக்கும் மற்றும் என்னுடைய நம்பிக்கை தூண் ஆன ரசிகர்களுக்கும் நெஞ்சார்ந்த நன்றிகள் எனவும், இது தான் எனக்கு கிடைத்த மிகச் சிறந்த பிளாக்பஸ்டர் பிறந்தநாள் பரிசு. என்றும் அன்புடன் தனுஷ் என பதிவிட்டுள்ளார்.
இப்பதிவு இணையத்தில் வைரலாகி வருகிறது.